3 mamyrdan bastap Turkish Airlines áýe kompaniiasy túrki áleminiń rýhani astanasy - Túrkistan qalasynan Ystanbulǵa turaqty jolaýshylar reisin ashýdy josparlap otyr, dep habarlaidy "Ult aqparat".
Indýstriia jáne infraqurylymdyq damý ministrliginiń málimetinshe, túrik áýe kompaniiasy Túrkistan men Ystanbul qalalary arasynda B-737 áýe kemesimen aptasyna 3 turaqty reis oryndaidy (seisenbi, beisenbi, senbi kúnderi).
Budan basqa, 17 mamyrdan bastap otandyq loýkost tasymaldaýshy Fly Arystan kompaniiasy Túrkistan men Ystanbul arasynda jasalatyn reis sanyn aptasyna 7-ge deiin (kún saiyn) ulǵaitpaq.
Osylaisha, biyl mamyr aiynan bastap eki qala arasynda aptasyna 10 turaqty jolaýshylar reisi oryndalady.
Sonymen qatar, Túrkistannan Bishkekke (Qyrǵyzstan), Tashkentke (Ózbekstan) jáne basqa baǵyttarǵa jańa reister ashý josparda bar.
Reister sanitarlyq-epidemiologiialyq talaptardy qatań saqtai otyryp jáne áýe kompaniialarynyń saitynda jariialanǵan kestege sáikes oryndalady.
