Túrkistan qalasynyń ákimi Rashid Aiýpov BAQ qyzmetkerlerine arnaiy press-týr aiasynda oblys ortalyǵyndaǵy jańa nysandardy tanystyrdy, dep habarlaidy "Ult aqparat" óńirlik kommýnikatsiialar qyzmetine silteme jasap.
Aldymen arnaiy top ákimshilik-iskerlik ortalyǵyndaǵy «Kongress Holl» kontsert zalymen tanysty. Ǵimarattyń aýmaǵy - 6438 sharshy metr. Saraidyń birinshi qabatynda 1000 oryndyq kórermen zaly, ákimshilik úi-jailar jáne balalar oiyn bólmesi bar. Ekinshi qabatta jinalys bólmesi men ákimshilik úi, 400 oryndyq zal ornalasqan.
Keiin BAQ qyzmetkerleri 7000 kórermenge laiyqtalǵan «Turkistan Arena» stadionyna aialdady. Stadion ǵimaratynda akrobatika, boks, aýyr atletikaǵa arnalǵan zaldar bar. Sonymen qatar, joǵary bilikti sportshylardy daiyndaýǵa arnalǵan tolyqqandy kúndelikti jattyǵýlar ótkizýge jaǵdailar qarastyrylǵan. Týr aiasynda top Oqýshylar saraiynyń qurylysymen de tanysty. Nysan aýmaǵy 9250 sharshy metr. Ǵimarat 1200 oqýshyǵa arnalǵan. Ondaǵy teatr zaly 400 adamdy, al konferents-zal 80 adamdy qabyldai alady.
Túrkistan qalasynda jańa nysannyń biri «Otyrar» yqshamaýdanyndaǵy basseini bar sport kesheni. Jalpy aýmaǵy 3,82 gektardy quraityn nysan 1300-den astam adamdy qabyldai alady. Sport kesheninde keńse bólmeleri, shaǵyn fýtbol, basketbol, voleibol, gandbol siiaqty sporttyq is-sharalarǵa arnalǵan jattyǵý zaly, sondai-aq sport, ioga zaly, ústel tennis zaly jáne olimpiadalyq parametrleri sai sport basseini bar.
Press-týr aiasynda qalada týristerge arnalǵan «Qabyldaý ortalyǵy» tanystyryldy. Kelýshilerdiń nazaryn aýdaratyn ondaǵy qundy jádigerler men tarihi kitaptar. Iaǵni, rýhani shaharǵa kelgen qonaqtar Qabyldaý ortalyǵyna kelip, Túrkistan jaily tolyq málimet ala alady. Onda tamaqtaný oryndary, elektrondy karta, úsh túlde málimet beretin aýdiogid bar. Qonaqtar Qazaq handyǵy interaktivti zalynda Kenesary hannyń qylyshynyń túpnusqasy jáne basqa da jaýyngerlik kiimderdi kóre alady. Sondai-aq, onda Túrkistan oblysy aýmaǵynyń tarihi jerleri interaktivti taqta arqyly kórsetiledi. Sonymen qatar, BAQ qyzmetkerleri «Áziret-Sultan» tarihi-mádeni qoryq mýzeii aimaǵyndaǵy «Etno aýyl» jobasymen tanysty. Etno aýylda - qolóner sheberhanasy, shyǵys bazary, dástúrli taǵamdar aimaǵy, ulttyq oiyndar alańy, merekelik qoiylymdar alańy, atqa arnalǵan alań ornalasqan.
