Túrki tildes memleketterdiń yntymaqtastyq keńesiniń beiresmi onlain rejimdegi sammitinde Qyrǵyzstan Prezidenti Sadyr Japarov Qazaqstan men Ózbekstan prezidentterine alǵys aitty, dep habarlaidy QazAqparat.
«Bul sammit bastapqyda Túrkistan qalasynda ótýi kerek bolatyn. Bul shahardyń tarihi mura retindegi róli joǵary. Degenmen pademiia bul sammit boiynsha jospardy ózgertip, onlain rejimde uiymdastyrylyp otyr. Bul turǵyda tsifrlyq diplomatiia jaqsy múmkindik berip tur jáne osynyń arqasynda bailanysqa shyǵyp otyrmyz. Barshalaryńyzdy Naýryz merekesimen quttyqtaimyn! Ejelden bul meiramdaǵy ortaq qundylyqtarymyz túrki tildes álemniń negizgi murasy. Jańa jylda Túrki tildes memleketterdiń yntymaqtastyq keńesi ary qarai da halyqtarymyzdyń bolashaǵy úshin jumys isteidi degen úmittemin», - dedi S. Japarov.
Sonymen qatar Qyrǵyzstan Prezidenti QR Tuńǵysh Prezidenti, Túrki keńesiniń qurmetti tóraǵasy Nursultan Nazarbaevqa alǵys aitty.
«Sizdiń Túrki keńesine qosqan úlesińiz óte joǵary. Sizdiń bergen keńesterińiz býyrlas memleketterdiń dostastyǵy men qýatyn arttyrady degen úmittemin», - dedi Sadyr Japarov Elbasy N. Nazarbaevqa qarata aitqan sózinde.
«Men sammitke alǵash ret Prezident retinde qatysyp otyrmyn. Biraq búgin sammit onlain ótkizilip jatqanymen, aldaǵy ýaqytta betpe-bet kezdesýge múmkindik alamyz dep senemin», - dedi ol.
Munymen qosa Qazaqstan Prezidenti Qasym-Jomart Toqaev pen Ózbekstan Prezidenti Shavkat Mirziioevke alǵysyn aitty.
«Men resmi saparmen barǵan kezde qabyldaǵany úshin eki eldiń prezidentterine rizashylyǵymdy bildiremin. Bolashaqta osy túrki tildes ózge de elderdiń basshylarymen kezdesý múmkindigine ie bolamyn degen úmittemin», - dedi Sadyr Japarov.
