Túrki investitsiia-integratsiialyq qoryn qurý jumystaryn tezdetý qajet. Bul týraly Túrki tildes memleketterdiń yntymaqtastyq keńesiniń beiresmi sammiti barysynda QR Prezidenti Qasym-Jomart Toqaev aitty, dep habarlaidy "Ult aqparat".
«Túrki investitsiia-integratsiialyq qoryn qurý jumystaryn tezdetý qajet. Bul - bizdiń elderimizge ortaq alǵashqy qarjy institýty. Bastamany barlyq múshe memleketter pysyqtaǵan soń onyń shtab-páterin Astana halyqaralyq qarjy ortalyǵynda ornalastyrýdy usynamyn», - dedi Memleket basshysy.
QR Prezidenti Astana qarjy ortalyǵy halyqaralyq bedeldi qarjy institýttarynyń úzdik tájiribesi men zamanaýi múmkindikterin biriktirgen biregei alań ekendigin basa aitty.
«Munda islam bankingi jáne sýkýk quraldary keńinen qoldanylady. Bul uiym Túrki elderine keń kólemde investitsiia tartýǵa jol ashatyn erekshe qurylym bolmaq», - dedi Qasym-Jomart Toqaev.
