Mańǵystaýǵa Túrkimenstan Respýblikasynan 153 qandas keldi, dep habarlaidy "Ult aqparat".
Mańǵystaý oblysy ákiminiń orynbasary Gúlmira Qalmuratovanyń málimetinshe, byltyr álemdegi pandemiiaǵa bailanysty elimizde kóship-qonýshylar aǵyny keiinge qalǵan.
Sodan beri sheteldik qandastarymyz el aýmaǵyna kirgizilgen joq.
Úkimettiń qoldaýymen búgin barlyq sanitarlyq talaptar saqtala otyryp, Qazaqstanǵa kóship kelýge ótinish tastaǵan qandastarymyz óz erkimen tarihi Otanyna qonys aýdardy.
«Olardy Qazaqstan - Túrkimenstan shekarasyndaǵy «Bolashaq» stansasynda Qaraqiia aýdany ákimdiginiń qyzmetkerleri men Qaraqiia ortalyq aýdandyq aýrýhanasynyń medbikeleri qarsy aldy. Qonys aýdarýshylardyń PTR test synamasynyń nátijesi men tiisti qujattary tekserilip, poiyzǵa otyrǵyzyldy. Osy oraida alystan at terletip kelgen býyrlas aǵaiyndy dittegen jerge esh qiyndyqsyz jetkizip salýǵa qol ushyn bergen «Qazaqstan temir joly» «Jolaýshylar tasymaly» AQ-na alǵys aitamyz», - deidi Gúlmira Qalmuratova.
Baýyrlas aǵaiyndar mingen poiyz Jańaózen stantsiiasyna, odan keiin Mańǵystaý stantsiiasyna keledi.
Olardy Jańaózen qalasy men Munaily aýdany ákimdiginiń qyzmetkerleri kútip alyp, birqataryn týystarynyń úiine jaiǵastyrady.
Al bir bóligin ózge oblystarǵa shyǵaryp salady.
Atap aitsaq:
Aqtaý qalasy - 42 adam
Munaily aýdany - 58 adam
Túpqaraǵan aýdany - 11 adam
Jańaózen qalasy - 18 adam
Jambyl oblysy - 9 adam
Almaty qalasy - 11 adam
Aqtobe oblysy - 1 adam
Shymkent qalasy - 2 adam.
