QR Úkimetiniń baspasóz ortalyǵynda ótken baspasóz konferentsiiasynda «Qazaqstannyń turǵyn úi qurylys jinaq banki» AQ basqarma tóraiymy Lázzat Ibragimova «Nurly jer» memlekettik baǵdarlamasy boiynsha turǵyn úi berý týraly aityp berdi, dep habarlaidy "Ult aqparat" primeminister.kz portalyna silteme jasap.
«Elbasy N. Nazarbaevtyń tapsyrmasy boiynsha biyl «Qazaqstannyń turǵyn úi qurylys jinaq banki» AQ tabysy tómen otbasylar úshin «Baqytty otbasy» jeńildetilgen nesie berý baǵdarlamasyn iske qosty. Bul baǵdarlamada alǵash ret áleýmettik ádilettilik qaǵidasy qoldanyldy. Baǵdarlamaǵa sońǵy jarty jylda otbasynyń árbir múshesine shaqqandaǵy kirisi 42 500 teńgeden aspaityn otbasylar qatysa alady.
Búgin bizge osyndai otbasylardan 5 myń ótinish kelip tústi. Olardyń 2,5 myńy maquldandy. Olar qazir páter izdep, qujattaryn jinap jatyr. 455 otbasy jańa úilerine kóshti», — dedi L. Ibragimova.
L. Ibragimova sonymen qatar, eger «Baqytty otbasy» baǵdarlamasy boiynsha baspana alýǵa ruqsat alǵan adamdarda bastapqy jarna úshin tóleitin qarajattary jetispese, olar ákimdikterdiń turǵyn úi sertifikattaryna senim arta alatynyn aitty. Búgingi tańda Aqtóbe, Nur-Sultan qalalarynyń ákimdikteri 1 million teńgege deiin turǵyn úi sertifikattaryn bóldi.
«Kósh bastap turǵan úsh óńirdi atap ótkim keledi. Bizge Nur-Sultan qalasynyń turǵyndarynan 800-den astam, Almatydan – 650, Aqtóbe men Aqtóbe oblysynan 542 ótinim kelip tústi», — dedi L. Ibragimova.
QTQJB derekterine sáikes, jyl sońyna deiin 5 myń qazaqstandyq otbasy óz páterleriniń kiltterin alady.
«2020 jyly Memleket basshysynyń tapsyrmasymen «Nurly jer» baǵdarlamasy aiasynda josparlanǵan memlekettik kómek kólemi ulǵaitylady. Endi 10 myń qazaqstandyq otbasy «Baqytty otbasy» baǵdarlamasy boiynsha baspana satyp alý úshin jyldyq 2%-ben jeńildetilgen nesie alady. Alǵashqy jarna 10% quraidy.
Jalpy, «Nurly jer» baǵdarlamasyn júzege asyrýdyń 2,5 jylynda Qazaqstannyń turǵyn úi qurylys jinaq banki júiesi arqyly 18 235 otbasy jańa páter kiltterine ie boldy.
Jyl sońyna deiin “Baqytty otbasy” men ákimdikterden beriletin páterlerdi eskere otyryp, 25 myń qazaqstandyq otbasy qonys toiyn toilaidy dep oilaimyz. Otbasynyń ortasha koeffitsienti 3,8 bolǵan kezde 100 myńǵa jýyq qazaqstandyq 2,5 jylda jańadan qonystanýshylar boldy», — dedi Qazaqstannyń turǵyn úi qurylys jinaq bankiniń basqarma tóraiymy.
Qazirgi tańda Qazaqstannyń turǵyn úi qurylys jinaq banki júiesinde 1 416 000 salymshy tirkelgen. Aǵymdaǵy jyldyń 8 aiynda 210 myńnan astam jańa depozit ashyldy.
