Turǵyn úi kooperativteriniń qyzmetin qatań reglamentteý qajet. Bul týraly Májilis depýtaty Faizolla Kamenov aitty, dep habarlaidy QazAqparat.
«Qazirgi ýaqytta Qazaqstanda 1 827 túrli tutyný kooperativi tirkelgen. Biraq azamattardyń shaǵymdary kóbine turǵyn úi tutyný kooperativteriniń áreketine túsedi. Búgingi tańda quqyq qorǵaý organdary qarjy piramidasyn qurý faktileri boiynsha kóptegen is tergeýde. Onyń ishinde respýblika «Novyi dom 2017», «Svoi dom», «Best Vei-Nedvijimost», «Shańyraq KTK», «Otan stroi» siiaqty óndiristik kooperativter nazarǵa erkeshe túsedi. Olardyń jalpy zalal somasy - 200 mln teńgeden asady. Bul - qylmystyq is qozǵalǵan turǵyn úi kooperativteriniń tolyq emes tizimi. Biraq kóbine quqyq qorǵaý organdary aktsionerler men kooperativterdiń quqyqtyq qatynastarynyń azamattyq-quqyqtyq sipatyna silteme jasai otyryp, mundai jaǵdailardy tergeýden bas tartady», - dedi búgin Májilistiń jalpy otyrysynda QR Premer-Ministriniń orynbasary Roman Skliarǵa depýtattyq saýal joldaǵan Faizolla Kamenov.
Onyń atap ótýinshe, mundai uiymdarǵa ýákiletti organdar tarapynan tiisti baqylaý júrgizilmeidi.
Tutyný kooperativterin qurý aitarlyqtai jeńil, biraq osy oraida azamattardyń óz aqshasyn joǵaltyp alýy sekildi saldar áli de memlekettiń problemasyna ainalyp otyr.
«Osy depýtattyq saýalmen turǵyn úi satyp alý úshin azamattardyń qarajatyn tikelei nemese janama túrde tartatyn barlyq osyndai kooperativterdiń qyzmetin qatań túrde reglamentteý qajet ekendigin suraimyz. Al aldanǵan turǵyn úi salymshylary sanynyń ósýine jol bermeý maqsatynda Úkimetke mynadai is-sharalardy qabyldaýdy usynamyz: tutyný kooperativterin tiisinshe baqylaý jáne olardyń qyzmetin reglamentteý úshin memlekettik organdardyń úilestirýshisin aiqyndap berý; tutyný kooperativteri arqyly baspana satyp alý úshin aqsha qarajatyn salý qaýpi týraly azamattardy habardar etý», - dedi Májilis depýtaty.
