Ishki ister ministri Ekibastuz qalalyq politsiia basqarmasynyń basshysyn jumysynan bosatty. Pavlodar oblystyq politsiia departamentiniń tergeý basqarmasynyń laýazymdy tulǵalary men departament basshysynyń orynbasaryna qatań sógis jariialandy, dep habarlaidy IIM baspasóz qyzmeti.
Ishki ister ministri Erlan Turǵymbaevqa gaz ballonynyń jarylýynan kúiip qalǵan kelinshek aryzdanǵan bolatyn. Osydan keiin Ekibastuz qalasyna arnaiy tekseris jiberildi. Sonyń nátijesi boiynsha birqatar laýazymdy tulǵalar jazalandy.
Resmi málimetke sáikes, Ekibastuz qalasyna ministrliktiń bir top qyzmetkeri bardy. Olar gaz ballonynyń jarylýyna qatysty qylmystyq istiń sozylyp ketý sebepterin zerdelep shyqty. Osy oqiǵada eki adam qaitys boldy. Al bir kelinshek pen onyń kishkentai qyzy qatty kúiip qaldy.
"Qyzmettik tekseris kezinde Qylmystyq is júrgizý kodeksiniń talaptaryn buzý pen qylmystyq isti tergeý merzimin negizsiz toqtatý faktileri anyqtaldy. Búginde osy tártip buzýshylyqtar úshin dál osy qylmystyq iske jaýapty bolǵan bas tergeýshi jáne tergeýshi, sondai-aq, Ekibastuz qalalyq politsiia basqarmasynyń tergeý bóliminiń basshysy jumystan bosatyldy", - delingen resmi habarlamada.
