Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiiniń direktory Turdyqul Shańbai Prezident Qasym-Jomart Toqaevtyń «Halyq birligi jáne júieli reformalar – el órkendeýiniń berik negizi» atty Qazaqstan halqyna Joldaýyna qatysty pikir bildirdi, dep habarlaidy QazAqparat.
«Memleket basshysy osy Joldaýyn Táýelsizdiktiń bárinen qymbat ekeninen bastady. «Egemendik degenimiz – jalań uran men jalyndy sóz emes. Biz úshin eń mańyzdysy – ár azamattyń Táýelsizdik igiligin sezine alýy» dedi Prezident. Rasymen de Táýelsizdiktiń igiligi – bul asa qudyretti sóz. Abai mýzeiiniń qyzmetkerleri májilis zalyna jinalyp, Joldaýdy tyńdap, óz oiymyzdy ortaǵa saldyq. Jeti baǵyt boiynsha josparlanǵan isterdi tyńdap, eńsemiz kóterilip, marqaiyp qaldyq. Halyqtyń ál-aýqatyn arttyrýǵa erekshe den qoiylǵany qýantady. Prezident kótergen ár bastama halyqtyń kóńilinen shyqty», - dedi ol.
Onyń aitýynsha, byltyr Prezidenttiń tikelei qoldaýymen Abai mýzeii jandana tústi.
«Hakimniń 175 jyldyq mereitoiyna Qasym-Jomart Kemeluly ózi kelip, jańarǵan mýzeidi ashyp berdi. Halyq arasynda búginde Abai mýzeii týraly «Danalyq pen jańalyqtyń úndesken mýzeii» degen tirkes te qalyptasty. Pandemiianyń asqynyp turǵan kezinde, Abai mýzeiinde qurylys, qaita jańǵyrtý jáne ǵylymi-tanymdyq jumystar óte qarqyndy júrdi», - dedi Turdyqul Shańbai.
