Foto: Artiom Chýrsinov
Elordada «Tumar-2022» ulttyq televiziialyq syilyǵynyń jeńimpazdary marapattaldy, dep habarlaidy QazAqparat.
Televiziialyq sheberlik úshin beriletin «Tumar-2022» ulttyq syilyǵynda 10 nominatsiia bar. Biyl syilyq alýǵa 300-ge jýyq ótinim kelip túsken, eń kóp ótinim «Úzdik derekti film», «Úzdik aqparattyq baǵdarlama», «Úzdik áleýmettik joba», «Úzdik telejýrnalist», «Úzdik telejúrgizýshi» nominatsiialary boiynsha qabyldanǵan.
Eń aldymen QR Premer-Ministriniń orynbasary Eraly Toǵjanov «Úzdik derekti film» atalymynyń jeńimpazyn jariialady. Munda «ATYRAY» telearnasy túsirgen «Kaspiiden ketken qypshaqtar» filmi top jardy.
«Úzdik aqparattyq baǵdarlama» júldesine ASTANA TV telearnasynyń «Saraptimes» baǵdarlamasy laiyq dep tanyldy. Músinsheni Nur-Sultan qalasynyń ákimi Altai Kólginov tabystady.
«Úzdik áleýmettik joba» atalymynda «KTK» telearnasynyń «Daý-damaisyz» jobasy kósh bastady. Ony Prezident Teleradiokesheniniń Bas direktory Raýshan Qajybaeva tabys etti.
«Úzdik tok-shoý» júldesin jýrnalist Kemelbek Oishybaev berdi, bul júldeni «Atameken Business» telearnasynyń «Vremia govorit» jobasy jeńip aldy.
«Úzdik oiyn-saýyq baǵdarlamasy» atalymynda «Almaty» telearnasy ázirlegen «Almaty Bala Fest» jobasy úzdik atandy. Júldeni QR Parlamenti Senatynyń depýtaty Dana Nurjigit tapsyrdy.
«Úzdik televiziialyq serial» syilyǵyn tabystaý úshin sahhnaǵa «Ekspress-K» gazetiniń bas redaktory Aleksandr Aksiýtits shaqyryldy. Munda qazylar alqasynyń sheshimimen «Qazaqstan» ulttyq telearnasy túsirgen «Ahmet. Ult ustazy» úzdik serial atandy.
Sonymen birge, aimaqtar arasynda «Turkistan» telearnasy «Úzdik aimaqtyq telearna» atandy. Bul syilyqty AMANAT partiiasynyń Atqarýshy hatshysy Ashat Oralov berdi.
«Úzdik rejisserlik jumys» nominatsiiasynda «Qazaq TV» telearnasynyń «Jena» jobasy top jardy.
«Úzdik telejýrnalist» júldesin QR Parlament Májilisiniń depýtaty Darhan Myńbai tabys etti. Munda «Habar 24» telearnasynyń Ońtústik Koreiadaǵy menshikti tilshisi Vladislav Tsoi jeńimpaz atandy. V. Tsoi saltanatty marapattaý keshine Seýlden tikelei efirge shyqty.
Kesh sońynda «Úzdik telejúrgizýshi» atalymynda «31 arna» telejúrgizýshisi Asqar Meńdibaev jeńimpaz atandy. Júldeni QR Aqparat jáne qoǵamdyq damý ministri Asqar Omarov tabystady.
Sondai-aq «Ádil qazy alqasynyń arnaiy syilyǵy» «Balapan» telearnasyna berildi. Arnaiy syilyqty tabystaý mártebesi Erlan Qaringe berildi.
«Tumar» júldesin marapattaý keshinde «Balalar jylyna» erekshe mán berildi. Keshti balalar júrgizdi jáne barlyq jeńimpazdar balalarmen sahnaǵa shyqty.
Aita keteiik, «Tumar» ulttyq televiziialyq báigesi 2017 jyly Qazaqstan Respýblikasy Aqparat jáne qoǵamdyq damý ministrliginiń bastamasymen qurylǵan. Syilyq jeńimpazdary qazaqstandyq televiziiany damytýǵa qosqan úlesi úshin «Tumar» músinshesi men 1 million teńge kóleminde aqshalai syiaqy alady.
