Foto: Ult.kz
Qadyr Myrza Áli týraly aqyn Aqushtap Baqtygereevanyń esteliginen:
Bizdiń sanamyzda uly Abai bar. Qazaq ultyna ǵasyrlap qyzmet ete beretin aqyn. Al Qadyr aǵań bolsa: «Abai men ekeýmizdiń ortamyzda bala joq» deidi. Olai deitini, Qadyr Myrzaliev te qazaq ultyna ulttyq formada qyzmet etken aqyn. Myrzaliev óleńderin «Men qazaqpyn» dep, jáne erteń osy ultqa qyzmet etemin dep jazatyn. Ol búkil taqyrypqa jazǵan. Kishkentai balaǵa jumbaqtan bastap, oqýshyǵa «Kúmis qońyraý» degen eńbekpen qostap, eseigen, azamat bolǵan kezde oqityn óleńdermen jalǵastyrdy. Qalai qazaq bolýdy óziniń poeziiasymen úiretip ketken aqyn. Onyń barlyq óleńi búgin bizdermen birge, kúnde ómir súrip otyr.
Jasyl jailaý, túkti kilem, kók kilem
Kók kilemde kóp aýnaimyn, kóp kúlem
Asqar taýy aspanymen talasqan
Qazaǵymnyń mártebesi dep bilem.
Mine, osylai án shyrqap turyp, oily da, parasatty dúnieler jazǵan. Bir ǵana óleńimen búkil qazaq ultynyń taǵdyryn jazý aqynnyń eń úlken sheberligi.
Babalardyń shoq basqan tabanymen
Birdei eken jaqsysy jamanymen.
Bir jamany — tynymsyz kóshe bergen,
Bir jaqsysy — qimaǵan dalany keń.
Bir jamany — keshigip álippe ashqan,
Bir jaqsysy — kúileri kóbik shashqan.
Bir jamany — qyzdaryn malǵa satqan,
Bir jaqsysy — súigenin alyp qashqan.
Bir jamany — sharýasyn mańdytpaǵan,
Bir jaqsysy — qýlyqpen jandy utpaǵan.
Bir jamany — úilenip jeńgesine,
Bir jaqsysy — jesirin qańǵytpaǵan.
Osy óleńniń ózinde qazaqtyń bútin bir parasaty, tarihy jáne uly ulaǵaty jatyr.
Búgingi tańda kóbeigen shýly toilarda kez kelgen asaba Qadyr Myrzaliev óleńimen kún kórip, tamaǵyn taýyp jatyr desem ótirik emes. «Qazaq osy quda bol dep qinaityn» dep bastalady toi, solai kete beredi. Mine, Qadyr aǵanyń óleńi kez kelgen jerde, kez kelgen qazaq balasyna kómekke keledi.
Qadyr Myrzaliev qazaq poeziiasyn birneshe tomdarmen toltyryp ketti. Myrzalievten ómirdiń barlyq suraǵyna jaýap alýǵa bolady.
HH ǵasyrdaǵy aqyn-jazýshylardyń arasynda eń kóp kitap jinaǵan – Qadyr Myrzaliev. Qadir aǵanyń kitap jinaýy erekshe edi. Tańerteń erte turyp, bazarlarǵa baratyn. Ol jinaǵan kitaptaryn úiine keletin adamdardan sondai saqtap otyratyn. Sondai kitap kúzetken aqyn. Qazir onyń kitaptary óziniń týǵan jerinde, Aqjaiyqta saqtalǵan.
Biyl qazaq poeziiasyndaǵy úsh qurdas aqynnyń mereitoiy toilanbaqshy. Ol – bizge ánuran jazyp bergen Jumeken Nájimedenov, ol – bizdiń dáýirdiń bútin bir ǵajaiyp ánderiniń sózin jazǵan lirik aqyn Tumanbai Moldaǵaliev. Tumanbai Moldaǵaliev pen Qadyr Myrzaliev bir jylda týǵan, bir jylda qaitys bolyp, birge ómir súrip, qolustasyp júrdi. Bir-birin syilap, jaqsy kórdi. Ekeýi qatar kitap jazdy, qatar jumys istedi. Ekeýiniń ǵumyry ǵajaiyp dostyqta ótti. Biyl sol eki ǵajaiyp aqynǵa Almatyda eskertkish qoiady dep úmittenemin.
