Biyl halyq jazýshysy, qazaq ádebieti men jýrnalistika salasynda óshpes iz qaldyrǵan belgili qalamger Sherhan Murtazanyń týylǵanyna 90 jyl toldy.
Túlkibas aýdanyndaǵy Sherhan Murtaza atyndaǵy mektepte Sherhan Murtaza atyndaǵy qaiyrymdylyq qordyń uiytqy bolýymen «Tuǵyry biik tulǵa» atty ǵylymi-tanymdyq konferentsiia ótti. Oǵan Túlkibas aýdany ákiminiń orynbasary M.Janesen, aýdan jáne Jambyl oblysynyń belgili ǵalymdary men jazýshylary jáne aýdan ziialylary, muǵalimder qatysty.
«Túrki álemine qyzmeti úshin syilyqtyń laýreaty», Abaitanýshy M.Myrzahmetuly bastaǵan bir top ǵalymdar men jazýshylar, M.H.Dýlati atyndaǵy Taraz óńirlik ýniversitetiniń «Filologiia jáne jýrnalistika» kafedrasynyń professory M.Kópbaeva, Taraz qalasyndaǵy Sherhantaný ǵylymi zertteý ortalyǵynyń direktory Q.Tamabaeva, M.H.Dýlati atyndaǵy Taraz óńirlik ýniversitetiniń «Filologiia jáne jýrnalistika» kafedrasynyń dotsent T.Muqashev jáne QR Jýrnalister Odaǵynyń múshesi E.Ábdiev búkil ǵumyryn ulttyq mádeniet pen ádebiettiń damýyna arnap, keiingi urpaqqa rýhani bai mura qaldyrǵan qalamger Sherhan Murtazanyń shyǵarmalary men eńbegi jaiynda baiandamalar jasady.
«Túlkibasy-tulparlar týǵan jer, suńqarlar qonǵan jer»-degen teńeýdiń avtory Sheraǵa 1932 jyly enshiles Túlkibas pen Jýaly aýdandary bir aýdan bolyp turǵan shaǵynda ómir esigin Talapty (Jýaly) aýylynda ashqan. Sol sebepten, kórnekti qairatkerdi Túlkibas aýdanymen kóp nárse bailanystyrady.
Mereitoilyq jiynda kelgen qonaqtarǵa «Ulttyq qundylyqtar-ult qazynasy» jáne «Ulttyq Rýhtyń jarshysy» atty taqyrypta qolóner buiymdary men kitap kórmesi usynylyp, mekteptiń murajaiy tanystyryldy.
