Jýyrda úkimet memlekettik týdy úilerdiń qasbeti men balkonǵa ilýge ruqsat etti. Dese de qazaqstandyqtar úshin mindetti talaptar men shekteýler bar. Ony saqtamaǵandar ákimshilik jaýapqa tartylady, dep jazady Sputnik agenttigi.
Memlekettik týdy paidalaný aiasyn keńeitýdi qazaqstandyqtardyń ózderi usynǵan bolatyn. Bul ideiany prezident Qasym-Jomart Toqaev ta qoldai ketti. Ol qoldanystaǵy zańnamada týdy paidalanýǵa qatysty shekteýler baryn aityp, memlekettik rámizderdi paidalaný qaǵidalaryn qaita qaraýdy tapsyrdy. Kóp uzamai premer-ministr Asqar Mamin tiisti qaýlyǵa qol qoidy.
"Jeke jáne zańdy tulǵalar Qazaqstan Respýblikasynyń Memlekettik týyn ǵimarattarda (turǵyn úi jáne turǵyn úi emes oryn-jailarda), sonyń ishinde balkondar men saltanatty sharalar ótetin oryndarda patriottyq sezimin, qazaqstandyq biregeilikti bildirý, el men onyń azamattarynyń jetistikterin qoldaý maqsatynda paidalana alady", - delingen qujatta.
Qazaqstandyqtar óz páteriniń balkonyna ulttyq standartqa sai tigilgen (onyń kólemine qaramastan) týdy ǵana ile alady. Ulttyq standartqa sai kelmeý degenimiz – týdaǵy nysandy, mólsherdi jáne tehnikalyq talaptardy buzý. Memlekettik tý ulttyq standartqa sáikes kelmegen jaǵdaida, ol aýystyrylady nemese joiylady.
El azamattaryna jáne zańdy tulǵalarǵa bairaqty qorlaýǵa jáne mazaq etýge tyiym salynady.
Budan bólek, týdy bir qabatty jáne kóp qabatty ǵimarattarda ekstererli nusqada ornalastyrý kezinde ǵimarattyń sáýlet erekshelikterine qaramastan paidalanýǵa ruqsat berildi.
Sondai-aq, qazaqstandyqtarǵa ǵimaratqa ilingen týǵa qarańǵyda jaryq túsirip turý mindetti emes. Bul talap zańdy tulǵalar men memlekettik organdarǵa ǵana qatysty.
Týdy qandai jaǵdaida paidalanýǵa bolmaidy?
Memlekettik týdy úide adamǵa nemese zatqa qurmet retinde tómen túsirýge, teris qaratyp qoiýǵa jol berilmeidi.
Tý jerge, edenge, sýǵa tiip turmaýy tiis. Rámizdi kirletýge, bylǵaýǵa jáne jyrtýǵa tyiym salynady.
Sonymen qatar, memlekettik týdy mailyq jáne basqa da birrettik qoldanystaǵy zattarǵa, kiim-keshekke, tósek-orynǵa beineleýge bolmaidy. Oǵan jazý jazýǵa jáne sýret salýǵa tyiym salynady.
Budan bólek, týdyń saby kóldeneńinen kóterilmeidi.
Úide ilinetin tý jáne onyń beinesi sharýashylyq-turmystyq bólmelerden, kireberisten jáne kiim iletin bólmelerden alys ornalasýy tiis.
Aiyppul jáne onyń mólsheri
Qazaqstannyń memlekettik týyn kez kelgen adam tige almaidy. Bairaqty ruqsaty, iaǵni litsenziiasy bar kásiporyndar ǵana daiyndai alady. Sol sebepti týdy osy kompaniialarmen kelisimshartqa otyrǵan dúkenderden satyp alǵan jón. Áitpese memlekettik týdy zańsyz daiyndaǵany úshin aiyppul salynýy múmkin.
"Ákimshilik quqyq buzýshylyq týraly" kodekste ulttyq standart talaptaryna sáikes kelmeitin memlekettik týdy zańsyz daiyndaǵany úshin ákimshilik aiyppul qarastyrylǵan. Jeke tulǵalarǵa – 25 AEK (69 450 teńge), laýazymdy adamdarǵa, shaǵyn kásipkerlik sýbektilerine nemese kommertsiialyq emes uiymdarǵa – 50 AEK (138 900 teńge), orta kásipkerlik sýbektilerine – 75 AEK (208 350 teńge), iri kásipkerlik sýbektilerine – 200 AEK (555 600 teńge)", - dep naqtylady mádeniet jáne sport ministrliginiń baspasóz qyzmetinen.
Memlekettik rámizderdi shyǵarýǵa litsenziiasy bar kásiporyndar tizimimen myna silteme arqyly tanysýǵa bolady.
Memlekettik tý týraly ne bilemiz?
Tý – memlekettiń egemendik pen birtutastyqty bildiretin basty rámizderiniń biri. "Flag" termini "vlag" degen niderland sózinen shyqqan jáne belgilengen kólem men tústegi, ádette eltańba nemese emblema túrinde beinelengen, dińgekke nemese baýǵa bekitilgen mata uǵymyn bildiredi.
Qazaqstannyń Memlekettik týy resmi túrde 1992 jyly qabyldandy. Onyń avtory – belgili sýretshi Sháken Niiazbekov.
Memlekettik tý – ortasynda shuǵylaly kún, onyń astynda qalyqtap ushqan qyran beinelengen tik buryshty kógildir tústi mata. Týdyń sabynyń tusynda tik jolaq túrinde ulttyq órnek naqyshtalǵan. Kún, onyń shuǵylasy, qyran jáne ulttyq órnek beinesi altyn tústes. Týdyń eni men uzyndyǵynyń araqatynasy – 1:2
Qazaqstannyń bairaǵynda kók tús ashyq aspandy, beibitshilikti, igilikti bildirse, tústiń birkelkiligi elimizdiń tutastyǵyn meńzeidi.
Geraldika qaǵidattaryna sáikes, kún bailyq pen molshylyqty, ómirdi jáne kúsh-qýatty beineleidi. Sondyqtan elimizdiń týyndaǵy kún shapaǵy dáýlettilik pen baqýattylyqtyń simvoly – altyn masaq pishininde berilgen.
Al kún astynda qalyqtaǵan búrkit memlekettiń qýat-kúshin, onyń egemendigi men táýelsizdigin, biik maqsattar men jarqyn bolashaqqa degen umtylysyn tanytady.
Týdyń sabyn jaǵalai salynǵan ulttyq oiý-órnekter qazaq halqynyń mádenieti men dástúrin simvoldyq turǵyda beineleidi.
