Densaýlyq saqtaý ministri Aleksei Tsoi Qazaqstanda koronavirýsqa qarsy vaktsinany qaitalap egýdiń merzimin atady. Bul jaiynda Coronavirus2020.kz Telegram-kanalyndaǵy videoda jariialandy, dep habarlaidy "Ult aqparat".
«Bizde revaktsinalaý josparlanyp otyr. Qazirgi kezde tiisti qadamdardy aiqyndap jatyrmyz. Revaktsinatsiianyń eki túri bolady. Ujymdyq immýnitetti jalpy 60-70 paiyzǵa jetkizgenge deiingi shuǵyl ekpe bar. Sonymen qatar, josparly revaktsinatsiia eskerilgen. Ol jylyna bir ret bolady. Qazirgi kezde biz merzimdi pysyqtap jatyrmyz, sebebi Qazaqstanda vaktsinalaý aqpan aiynan bastap júrgizildi. Adamdardyń basym bóligi maýsym-shilde kezeńinde ekpe aldy. Osy oraida olardyń aǵzasyndaǵy antideneler áli de bar, onyń deńgeii de joǵary. Sondyqtan ekinshi dozany alǵannan soń shamamen 9 aidan keiin kúntizbege engiziledi. Qazirgi kezde áriptestermen osy máseleni qarastyryp otyrmyz», - dedi Tsoi.
Onyń aitýynsha, qaitalap ekpe jasaý taqyrybyn birinshi kezekte ótken jyly vaktsina júrgizgen AQSh, Izrail, Resei kótere bastady. Bul elderde birinshi vaktsina salynǵannan beri 9 aidan astam ýaqyt ótip ketti.
«Biz úshin revaktsinatsiia qazan aiyna qarai ózekti bolady. Iaǵni, aqpan aiynyń basynda birinshi ekpeni alǵan bizdiń azamattarǵa qatysty atalǵan merzim jetkilikti bolady. Sondyqtan bul qadamdar anyqtalyp jatyr, olardy normativtik turǵyda bekitemiz. Dúniejúzilik densaýlyq saqtaý uiymymen taǵy da konsýltatsiia júrgizemiz», - dedi ministr.
