Qazaqstanda koronavirýsqa qarsy aqyly vaktsinalaý ruqsat etilmegen. Bul týraly Densaýlyq saqtaý ministri Aleksei Tsoi aitty, dep habarlaidy "Ult aqparat".
«Qazirgi kezde tek memlekettik ainalymda paidalanylatyn vaktsina retinde Qazaqstanǵa resmi jetkizilgen jáne óndirilgen ekpe qamtylǵan. Mindetti áleýmettik meditsinalyq saqtandyrý júiesine qatysqan jeke klinikalar Qormen kelisimshartqa otyrǵan. Osy oraida olar ekpe alýǵa jatatyn adamdarǵa aqysyz negizde vaktsina salady», - dedi ministr Ortalyq kommýnikatsiialar qyzmetinde.
Sonymen qatar Tsoi el aýmaǵynda vaktsinanyń satylýy jaǵdaiy anyqtalǵanda mindetti túrde habarlaýǵa shaqyrdy.
«Sebebi qazirgi ýaqytta Qazaqstanda vaktsinany resmi satý ruqsat etilmegen», - dedi vedomstvo basshysy.
Budan buryn habarlanǵandai, Aleksei Tsoi sońǵy 2 aptada Almaty, Nur-Sultan, Shymkent qalalarynda, Aqtóbe, Almaty oblystarynda naýqas sany artyp, jalpy KVI juqtyrǵandar 1,5 ese óskenin aitty.
«Halyq arasynda virýstyń qaýiptiligine senbeitin adamdar bar, olar úilený toilaryn, banketterdi jeke úiler men kottedjderde ótkizýdi jalǵastyryp keledi», - dedi ministr.
