Densaýlyq saqtaý ministri Aleksei Tsoi KVI-ge qarsy vaktsinany elde qansha adam saldyrǵanyn málim etti, dep habarlaidy "Ult aqparat".
«Koronavirýs infektsiiasyna qarsy vaktsinatsiia jalǵasýda. Búginde birinshi komponent 131 170 adamǵa egildi. 22 aqpannan bastap ekinshi komponentti egý bastaldy, 32 482 adam egildi, jaǵymsyz reaktsiia tirkelgen joq», - dedi ministr Ortalyq kommýnikatsiialar qyzmetinde.
Onyń aitýynsha, óńirlerge KVI-ge qarsy vaktsinanyń 150 myń dozasy jetkizilip jatyr.
«Budan basqa, sáýirde túrli óndirýshilerden qosymsha 2,5 mln doza vaktsina jetkizý josparlanyp otyr. Vaktsinanyń bul kólemi KVI-ge qarsy vaktsinatsiialaýǵa jatatyn kontingentti jáne vaktsina saldyrǵysy keletin adamdarǵa ekpeniń qoljetimdiligin barynsha keńeitýge múmkindik beredi», - dedi Tsoi.
Halyqty KVI-ge qarsy profilaktikalyq egýlermen qamtýdy ulǵaitý maqsatynda «Qazaqstan Respýblikasynyń halqy arasynda koronavirýs infektsiiasy aýrýlarynyń aldyn alý jónindegi sharalardy odan ári júrgizý týraly» Qazaqstan Respýblikasynyń Bas memlekettik sanitariialyq dárigeriniń 2021 jylǵy 27 qańtardaǵy № 3 qaýlysyna birqatar ózgerister engizildi.
Osylaisha, KVI-ge qarsy vaktsinatsiialaýǵa jatatyn kontingentti jáne olardy vaktsinatsiialaýdyń basymdylyǵyn halyqtyń túrli toptarynyń epidemiologiialyq mańyzdylyǵyn eskere otyryp, KVI aýrýy boiynsha epidemiologiialyq jaǵdaiǵa jáne KVI-ge qarsy vaktsinalar kóleminiń jetkizilýine bailanysty jergilikti atqarýshy organdarmen kelisim boiynsha oblystardyń, respýblikalyq mańyzy bar qalalardyń bas memlekettik sanitariialyq dárigerleri qaita qaraýy múmkin.
«Vaktsinalaý virýstyń taralýyn azaitýdyń jalǵyz joly ekenin eske salamyz. Osyǵan bailanysty qarsy kórsetkishter bolmasa, qazaqstandyqtardy ekpe saldyrýǵa shaqyramyn», - dedi ministr.
