Premer-ministr Álihan Smaiylov memlekettik qyzmetterdi halyqqa barynsha qoljetimdi etý máselesin kóterdi, dep habarlaidy Sputnik Qazaqstan.
Aitýynsha, sońǵy bir jyldyń ishinde kórsetiletin memlekettik qyzmetterdiń sany 2 esege jýyq ósken. Qazirgi tańda elektrondy formattaǵy qyzmetterdiń deńgeii 93%-ti quraidy. Al qyzmetterdiń 66%-in azamattar kádimgi smartfonnyń kómegimen alyp otyr.
"Elektrondyq qyzmetter men bazalardyń integratsiiasy azamattardyń ómirin jeńildetýge múmkindik berdi. Olar memlekettik organdardyń esigin tozdyryp, qaǵazbastylyqqa salynyp, áýrege túspeidi. Bul jumysty ári qarai keńeitý qajet", - dedi Premer Úkimet otyrysynda.
Ol elektrondy formattaǵy banktik qyzmet túrleri de jaqsy damyp kele jatqanyn atap ótti. Degenmen alaiaqtyq jaǵdailary azaimai tur. Smaiylov bankterge osy máselege barynsha nazar aýdaryp, klientterdiń derekterin qorǵaýdy kúsheitýdi tapsyrdy.
Úkimet basshysy elektrondy qyzmet salasyndaǵy birqatar problemaǵa toqtaldy.
Aitýynsha, ishki ister, aýyl sharýashylyǵy, ǵylym jáne joǵary bilim, indýstriia jáne infraqurylymdyq damý, densaýlyq saqtaý jáne qorǵanys ministrlikteri boiynsha keibir qyzmetterdi elektrondy formatta alý múmkin emes.
Sondai-aq syrtqy ister ministrligi men strategiialyq josparlaý jáne reformalar agenttigi boiynsha qyzmetterdi avtomattandyrý deńgeii tómen.
"Tsifrlyq damý ministrligine atalǵan memlekettik organdarmen birlesip, 3 ai merzimde qoljetimsiz memlekettik qyzmetterdi elektrondy formatqa kóshirýdi tapsyramyn", - dedi Smaiylov.
Budan bólek, ol tsifrlyq qujattardyń qoldanys aiasyn keńeitip, olardyń sanyn arttyrý qajet ekenin málimdedi.
"Qoldanystaǵy tsifrlyq qujattardy barlyq memlekettik organ zańdy túrde moiyndaýǵa tiis. Sondai-aq olardy ártúrli resýrstarǵa ornalastyrý qaýipsizdigin de oilastyrý qajet", - dedi Premer-ministr.
Úkimet basshysy tsifrlyq damý ministrligine ortalyq memlekettik organdarmen birlesip, eki ai ishinde osy máseleni tehnikalyq turǵydan iske asyrý josparyn bekitýdi tapsyrdy.
Sonymen qatar ortalyq memlekettik organdar men ákimdikter derekterdi únemi jańartyp, aqparattyq júielerdiń toqtaýsyz jumys isteýin jáne olardyń ýaqtyly integratsiialanýyn qamtamasyz etýge tiis.
