kollaj: Tengrinews.kz
Ulytaý oblysynyń Jańaarqa aýdanynda tsementsiz úi salǵan merdigerge aiyppul salyndy, - dep habarlaidy Tengrinews.kz.
Jańa ǵimarat Jańaarqa aýylynda salynǵan. Qurylysshylar tsementti únemdep, jumys istep jatqanyn birinshi bolyp jergilikti turǵyndar baiqaǵan. Olar video túsirip, áleýmettik jelide jariialady. Shaǵymdardan keiin qurylys jumystarynyń sapasyn arnaiy komissiia teksergen. Nysanda birqatar zańbuzýshylyq anyqtalǵan.
"Zańbuzýshylyqtar anyqtaldy. Úsh qatardy tsementsiz salǵan. Bul úshin merdigerge 400 AEK (shamamen 1,2 million teńge - esk.) aiyppul salyndy, hattama toltyrdyq. Tehnikalyq baqylaý boiynsha 60 AEK kóleminde aiyppul saldyq. Sonymen qatar, onyń kýáligin alty aiǵa toqtattyq", - dedi Qaraǵandy oblysy boiynsha memlekettik sáýlet-qurylys baqylaý departamentiniń basshysy Qairat Qamzin.
Jańaarqa aýdandyq qurylys bóliminiń basshysy da tártiptik jaýapkershilikke tartylǵan. Úi "Nurly jer" memlekettik baǵdarlamasy boiynsha turǵyzylǵan. Endi komissiia dál osy merdiger tapsyrǵan 17 kópqabatty úidiń sapasyn tekserýdi kózdep otyr.
