AQSh prezidenti Donald Tramp Ormýz buǵazynyń ataýyn óziniń qurmetine ózgertýdi usyndy, dep habarlaidy ult.kz.
«Endi biz ony AQSh retinde baqylaýymyzǵa alǵan soń, Ormýz buǵazyn Tramp buǵazy dep ataǵanymyz jón be??? Amerikanyń ózi siiaqty, ol burynǵydan da «ystyǵyraq» bolady!», dep jazdy Tramp Truth Social jelisindegi paraqshasynda.
Buǵan deiin AQSh prezidenti Ormýz buǵazy beinelengen kartalardy birneshe ret jariialap, onda buǵaz aýmaǵyn AQSh territoriiasy retinde kórsetken edi.
AQSh áskeri 1 qyrkúiekte Irandaǵy áýe shabýylyna qarsy qorǵanys júielerine, radiolokatsiialyq júielerge, teńiz nysandaryna, mina qondyrǵylary men bailanys nysandaryna soqqy bergenin málimdedi. Iran tarapy Ormýz buǵazy mańyndaǵy birneshe nysanaǵa soqqy jasalǵanyn habarlady, dep jazady Reuters.
Iran biliginiń ókilderi AQSh soqqylarynyń biri Sirik aýdanyndaǵy úige tigenin málimdedi. Olardyń aitýynsha, sol kezde úide úilený toiy ótip jatqan.
2 qyrkúiekte Irannyń áskeri qolbasshylyǵy AQSh-tyń Bahrein, Iordaniia, Kýveit jáne Iraktaǵy nysandaryna soqqy bergenin málimdedi. Iran tarapynyń aitýynsha, endigi maqsat – AQSh-tyń Taiaý Shyǵysta ondaǵan jyl boiy ustap kelgen keń aýqymdy áskeri bazalar jelisinen amerikalyq áskerilerdi yǵystyrý.
Iran tarapy shabýyldar kezinde Iordaniiadaǵy jáne Iraktyń soltústigindegi amerikalyq áskeri bazada birneshe AQSh áskeri qyzmetkeriniń qaza tapqanyn habarlady. Sonymen qatar Ormýz buǵazy arqyly ótip bara jatqan kezde amerikalyq personal basqaratyn eki tanker minaǵa ushyraǵan.
Ormýz buǵazynyń jaǵalaýy úsh memleketke tiesili. Onyń soltústik jaǵalaýyn tolyqtai Iran baqylaidy, al ońtústik bóligi Oman men Birikken Arab Ámirlikteri arasynda bólingen.
Aita keteiik, ótken aptada Kanadamen aradaǵy shielenis aiasynda Donald Tramp Ontario kóliniń ataýyn «Amerika kóli» dep ózgertý týraly jarlyqqa qol qoiǵan. Al 2025 jyldyń qańtarynda ol Meksika shyǵanaǵyn «Amerika shyǵanaǵy» dep ataýdy engizgen edi.
