AQSh prezidenti Donald Tramp eldegi kinoindýstriia daǵdarysqa ushyraǵanyn aityp, jergilikti kinostýdiialarǵa salyqtyq jeńildikter engizýdi usyndy, dep habarlaidy ult.kz RIA Novosti-ge silteme jasap.
Tramp bul bastamany «Oskar» syilyǵynyń iegeri, akter Djon Voitpen kezdesýde talqylaǵan. Buǵan deiin AQSh prezidenti Voitty Gollivýd máseleleri jónindegi arnaiy ókili etip taǵaiyndaǵan bolatyn.
«Gollivýd – tolyq jáne absoliýtti kúireý jaǵdaiynda. Ataýy dúrkirep turǵanymen, onda is júzinde jumys joq. Kino óndirisi Kanadaǵa jáne basqa elderge kóship jatyr, al AQSh-ta túsirilimder óte az júrgiziledi», – dedi Donald Tramp.
Onyń aitýynsha, Djon Voit pen kinoindýstriianyń basqa da ókilderi amerikalyq kino óndirisin qaita jandandyrý úshin federaldyq deńgeide salyqtyq yntalandyrý sharalaryn engizýdi usynyp otyr.
AQSh prezidenti kinostýdiialardyń jappai shetelge kóshýi Kaliforniia men basqa da shtattardyń ekonomikasyna aitarlyqtai ziian keltirip jatqanyn atap ótti.
Tramp bul másele boiynsha Kongresstegi eki partiianyń da kóshbasshylarymen konsýltatsiialar ótkizýdi josparlap otyr. Ol salyqtyq jeńildikterge jumsalǵan biýdjet qarajaty jańa jumys oryndarynyń ashylýy men federaldyq biýdjet kiristeriniń artýy esebinen «on esege óteletinine» senim bildirdi.
