QR Aqparat jáne qoǵamdyq damý ministri Dáýren Abaev tótenshe jaǵdai rejimindegi qaiyrymdylyq sharalary týraly aityp berdi, dep habarlaidy QazAqparat.
«Iá, qazir kúrdeli de qiyn ýaqyt. Biraq, bul qiyndyqtan qashý, eńseni túsirý degendi bildirmeidi. Elimizde kún saiyn júzdegen volonterler, metsenattar qaiyrymdylyq jasaýda. Óner adamdary onlain-kontsert berip jatyr. Odan basqa da meiirim mysaldary kóp. Osynyń barlyǵy rýhymyzdyń myqtylyǵyn dáleldeidi», - dep atap ótti ministr Habar 24 arnasyndaǵy onlain brifingte.
Bul sharaǵa biznes ókilderi de atsalysýda. Mysaly, «Kar-Tel», «Ksell», «Mobail Telekom-Servis» kompaniialary koronavirýspen kúresip jatqan barlyq dárigerlerdi tegin uialy bailanyspen qamtamasyz etti. Tótenshe jaǵdai kezinde elimizde 20 myńnan astam meditsina qyzmetkerlerine tegin bailanys jáne internet paketi berilgen.
«Soltústik Qazaqstan oblysynda meiramhana, kafe jáne ashana ieleri táýlik boiy jumys isteitin dárigerler men jedel járdem qyzmetkerlerine tegin ystyq tamaq tasyp júr. Elordada kúnine 200-ge jýyq dárigerge ystyq tamaq beriledi. Almatyda halyqaralyq meiramhanalar jelisiniń biri kúshtik qurylym qyzmetkerlerine túski as jetkizýde. Munyń barlyǵyn kásipkerler óz biznesi toqtatylǵanyna qaramastan jasap júr», - dedi D. Abaev.
Sonymen birge, ministr biznesin korǵanys quraldaryn shyǵarýǵa burǵan kásipkerlerdi erekshe atap ótti.
«Soltústik Qazaqstan jáne Aqmola oblystarynda antiseptik shyǵarý jolǵa qoiyldy. Shyǵys Qazaqstan tehnikalyq ýniversitetiniń zerthanasynda da anstiseptik shyǵaryla bastady. Jaqyn arada mundai óndirister ózge oblystarda da ashylady», - dedi Dáýren Abaev.
