QR Aqparat jáne qoǵamdyq damý ministri Dáýren Abaev tótenshe jaǵdai kezinde eldegi zańdylyq pen tártip saqtaýdy qamtamasyz etý jumystary qalai júrgizilip jatqany jóninde baiandady, dep habarlaidy "Ult aqparat".
«Qazir barlyq óńirlerde prokýratýra, politsiia jáne memlekettik kirister komitetiniń ókilderinen quralǵan mobildi toptar jumys isteýde. Olar barlyq jerde meditsinalyq maskalar men antiseptikterdi ruqsatsyz, joǵary baǵada satý boiynsha derekterdi anyqtaýmen ainalysyp jatyr. Tótenshe jaǵdai jariialanǵaly beri Qylmystyq kodekstiń 215-baby boiynsha 15 tergeý amaly bastaldy», - dedi ministr Habar 24 arnasyndaǵy onlain rejimdegi baspasóz máslihatynda.
Dáýren Abaev mundai jaǵdailar elordada, Almatyda jáne Aqtóbe, Almaty, Qaraǵandy, Qostanai, BQO-da anyqtalǵan.
«Elordada jáne Aqtóbe oblysynda maska men antiseptikti zańsyz satqan 40 adam ákimshilik jaýapqa tartyldy. Osy ákimshilik jáne qylmystyq ister boiynsha 4 mln maska men 13 myń litr antiseptik tárkilendi. Olar densaýlyq saqtaý mekemelerine berilip jatyr», - dedi ol.
