Jambyl oblysynyń Jýaly aýdandyq IIB politsiia qyzmetkerleri tótenshe jaǵdai kezinde jappai is-sharalar ótkizýdiń eki faktisin anyqtady, dep habarlaidy "Ult aqparat".
Jýaly aýdanyndaǵy Talapty aýylynyń 46 jastaǵy turǵyny jalpy tyiymǵa jáne koronavirýstyq infektsiiadan qorǵaný sharalaryna qaramastan, úiinde ótken qudylyqqa jáne qyzynyń uzatý toiyna qonaqtardy shaqyrǵan. Bul týraly oblystyq politsiia departamentiniń baspasóz qyzmeti habarlady.
«Zań buzǵan áiel adamǵa QR ÁQBtK-niń 476-babynyń 6-bóligine sáikes 10 ailyq eseptik kórsetkish mólsherinde 26510 (jiyrma alty myń bes júz on) teńge aiyppul salynǵan. Sondai-aq, ulttyq kókpar oiynynyń bastamashysy bolǵan Nurlykent aýylynyń 37 jastaǵy turǵyny da jaýapkershilikke tartylǵan» delingen vedomstvo habarlamasynda.
Aýyl turǵyndary arasynda at jarysyn ótkizgen quqyq buzýshy jeti táýlikke qamaýǵa alyndy.
Politsiia departamenti tótenshe jaǵdai rejimin buzǵany úshin eskertý nemese on ailyq eseptik kórsetkish mólsherinde aiyppul salý nemese 15 táýlikke deiingi merzimge ákimshilik qamaýǵa alý kózdelgenin eskertedi. Sonymen qatar, tótenshe jaǵdai jariialanǵan jerde bilik ókiline baǵynbaǵany úshin QR QK-niń 379-babyna sáikes qylmystyq jaza qarastyrylǵan.
