IV toqsanda mektep formasyn satyp alýdyń qajeti joq. Bul týraly Ortalyq kommýniktsiialar qyzmetinde ótken brifingide aityldy, dep habarlaidy QazAqparat.
«IV toqsandaǵy eń basty másele – sanitarlyq talaptardy qatań saqtaý. Búgingi kúni bilim basqarmalary, mektep ákimshiligi, mektep basshylyǵy barlyq sanitarlyq-epidemiologiialyq talaptardy saqtaý normalary boiynsha jumysyn jalǵastyrýda. Sonymen qatar, ár oqýshy, ár pedagog óziniń jeke bas gigienasyn saqtaý máselesin de umytpaýy kerek. Mektepte sabaqtar qatań tártipti saqtai otyryp jalǵasady», - deidi QR Bilim jáne ǵylym vitse-ministri Sholpan Karinova.
Onyń aitýynsha, ashanalardyń, mektep-internattardyń jumysy jergilikti bas sanitar dárigerlerdiń qadaǵalaýymen jalǵasa beredi.
«Ata-analarǵa aitqym keletini, IV toqsanda mektep formasyn satyp alýdyń qajeti joq. Oqýshylar ózderine qolaily, uqypty jáne taza kiim kiip, mektepke barýyna ruqsat etilgen. Qai pánniń qalai ótetinin ár mektep óz jaǵdaiyna qarai iske asyrady. Ministrlik qai pánderdi qashyqtan oqytýǵa bolatyny týraly usynym joldady. Onda mýzyka, kórkem eńbek, quqyq negizderi, grafika jáne jobalaý, kásipkerlik jáne biznes negizderi, informatika pánderin qashyqtan oqytýǵa bolatyny kórsetilgen. Dene shynyqtyrý páni shtattyq formatta taza aýada júrgizilýine ruqsat etildi», - deidi ol.
