Halyqaralyq balalardy qorǵaý kúnine orai el aýyzynda «batyr bala» atanyp ketken 13 jastaǵy mańǵystaýlyq Darhan Ámirhanǵa qurmet kórsetildi. Sońyna ergen bir inisi men úsh qaryndasyn órtten aman alyp shyqqan 7 synyp oqýshysyna belesebet, baǵaly syilyqtar jáne tótenshe jaǵdailar departamenti basshysynyń alǵys haty tabystaldy.
Sharaǵa «Nur Otan» partiiasy, «Jas Otan» jastar qanaty, depýtattar, assambleia músheleri jáne BAQ ókilderi qatysty.
Oqiǵa osy jyldyń 26 sáýirde Túpqaraǵan aýdany Saiyn Shapaǵatov aýylynda oryn alǵan. Bes bólmeli úide turǵan Bolatovtar otbasy eki er jáne úsh qyz bala tárbielep otyr. Sol túni ákesi men anasy úlken uly Darhanǵa balalarǵa baskóz bolýdy tapsyryp, ózderi jumysta bolǵan.
«Túngi mezgilde úidiń ishin qaita-qaita aralap, quddy bir tótenshe jaǵdai oryn alatynyn júregim sezgendei boldy. Bir ýaqytta uiyqtap ketippin. Túsimde tilsiz jaýmen arpalysyp jatqan ekenmin. Uiqydan oiansam kóz aldymda úidiń ishi qara tútin bolyp jatqan eken. Soǵan qaramastan inim men úsh qaryndasymdy úiden aman alyp shyǵyp, kórshiniń úiine aparyp tastaǵan soń, birden órt sóndirý qyzmetine habarlastym», - deidi batyr balaDarhan Ámirhan.
Órt sóndirýshilerden belgili bolǵandai, shaqyrtý 02:12 ýaqytynda túsken. Mamandar tilsiz jaýdy tez arada aýyzdyqtaǵan.
Darhannyń ákesi Baqytjan Bolatov bir kásipkerdiń kóligin jalǵa alyp otyr eken. Oqiǵa bolatyn túni ol jumysta bolǵan, al kóligi isten shyqqan. Al anasyn balabaqshada túngi kezekshilikke jumysqa shaqyrtqan. Sóitip úide úlken 13, al kishkentaiy 3 jastaǵy balalar ózderi qalǵan.
«Aldymen Alla, sodan soń balam Darhanǵa rizamyn. Kim biledi, olar úiden shyǵa almai qalǵanda bes balamnan aiyrylyp qalýym múmkin edi. Balamnyń batyrlyǵyna tánti boldym. Men qaisar balammen maqtanamyn», - dep aǵynan jaryldy Darhannyń ákesi Baqytjan.
«Nur Otan» partiiasy MOF tóraǵasynyń birinshi orynbasary Nuri Týmyshev bolsa batyr balanyń ákesi Baqytjan Bolatovqa alǵys hat tapsyrdy.
Al órttiń sebebi naqty neden ekendigi ázirge belgisiz. Mańǵystaý oblysy tótenshe jaǵdailar departamentiniń órt sóndirý jáne avariialyq qutqarý qyzmeti memlekettik mekemesiniń basshysy Erlan Máýlenov bolsa, toqtyń qysqasha tuiyqtalýy degen aldyn-ala boljam jasap otyr. Sonymen qatar órt nátijesinde keltirilgen materialdyq shyǵyn mólsheri de jaqyn kúnderi belgili bolmaq.
Aita ketý kerek, órtke oranǵan úidiń ishinde quran kitap ǵana janbai qalǵan, basqa zattardyń bireýide paidaǵa aspaidy.
Qazir Bolatovtar otbasy ýaqytsha sarai jaldap turyp jatyr. Órtke oranǵan bes bólmeli páterden túk qalmaǵan. Otaǵasy bolsa úiin jańadan turǵyzýǵa kirisip ketken. Múmkindiginshe aýyl ákimdigi, kórshi-kólem, týysqandary jáne halyq barynsha kómek qolyn sozýda. Qasietti Ramazan aiynda kópbalaly otbasyǵa jańa úidi salýǵa kómek kórsetilse nur ústine nur bolary sózsiz.
Kámshat Izbasarova
