Aqmola oblysynyń Arshaly aýdanynda tórt adamnyń ólimine sebep bolǵan er adamǵa qatysty sot sheshimi shyqty. Oblystyq sottyń málimetinshe, ol qylmystyq jaýaptylyqtan bosatylyp, mamandandyrylǵan psihiatriialyq statsionarda májbúrli em qabyldaityn boldy, dep habarlaidy ult.kz.
Sot materialdaryna sáikes, er adam buǵan deiin de quqyq qorǵaý organdarynyń nazarynda bolǵan. 2016 jyly ol bas bostandyǵyn shekteý jazasyna kesilip, qoǵamdyq jumystarǵa tartylǵan. Al 2022 jyly psihiatriialyq aýrýhanada májbúrli em alǵan. 2023 jyldan beri oǵan «paranoidty shizofreniia» diagnozy qoiylyp, psihiatrdyń turaqty baqylaýynda bolǵan.
Qaiǵyly oqiǵa biyl naýryz aiynda bolǵan. Tergeý deregine sáikes, er adamnyń uialy telefony isten shyǵyp, osyǵan bailanysty jienimen janjal týǵan. Jieni politsiia shaqyrǵanymen, anasy quqyq qorǵaý qyzmetkerlerinen ulyna shara qoldanbaýdy ótingen. Politsiia ketkennen keiin er adam ashýǵa minip, úidegilerge asúi baltasymen shabýyl jasaǵan.
Saldarynan onyń anasy, eki zeinetker jáne jieni oqiǵa ornynda qaza tapqan. Qurbandardyń úsheýi egde jastaǵy adamdar bolǵan.
Sot-psihiatriialyq saraptama qorytyndysy boiynsha, qylmys jasalǵan sátte er adam sozylmaly psihikalyq dertke shaldyqqandyqtan, óz áreketiniń mánin túsine almaǵan. Sondai-aq ol tergeý áreketterine qatysýǵa jáne sot aldynda jaýap berýge qabiletsiz dep tanylǵan.
Osyǵan bailanysty sot ony Qylmystyq kodekstiń 99-baby 2-bóliginiń 1 jáne 5-tarmaqtarynda kózdelgen qoǵamdyq qaýipti áreketti esi durys emes kúide jasaǵany úshin qylmystyq jaýaptylyqtan bosatyp, qatań oqshaýlaý jaǵdaiyndaǵy mamandandyrylǵan psihiatriialyq statsionarda májbúrli emdeýdi taǵaiyndady.
Qazir ol Almaty oblysy Talǵar aýdanyndaǵy respýblikalyq psihiatriialyq aýrýhanaǵa ornalastyrylǵan. Sot qaýlysy ázirge zańdy kúshine engen joq.
