Memleket basshysy Qasym-Jomart Toqaev Aqordada halyqaralyq pán olimpiadalarynda jeńimpaz atanyp, júldeli oryndarǵa ie bolǵan oqýshylar jáne stýdenttermen kezdesti, dep habarlaidy ult.kz.
Saltanatty sharaǵa 21 laýreat, sondai-aq olardyń ustazdary men tálimgerleri qatysty. Olardyń ishinde 6 oqýshy men stýdent altyn, 11-i kúmis, 4-eýi qola medal ielengen.
Prezident daryndy jastardy jetistikterimen quttyqtap, olardyń Qazaqstannyń abyroiyn halyqaralyq deńgeide kóterip júrgenin atap ótti.
«Qazaqstannyń jarqyn bolashaǵy – oiy ushqyr, bilimdi, daryndy jastardyń qolynda. Sizder el maqtanyshy degen atqa laiyqsyzdar!» – dedi Qasym-Jomart Toqaev.
Memleket basshysy biyl qazaqstandyq oqýshylardyń 44 halyqaralyq olimpiada men ǵylymi saiysqa qatysyp, myńnan astam medal jeńip alǵanyn aitty. Onyń ishinde 200-den astamy – altyn medal.
Prezident ásirese halyqaralyq fizika olimpiadasyndaǵy nátijege toqtaldy. Baiqaýǵa qatysqan Qazaqstannyń bes oqýshysynyń barlyǵy altyn medal ielengen. Memleket basshysy muny buryn-sońdy bolmaǵan biregei jetistik dep baǵalady.
Olimpiada júldegerlerine qansha syiaqy beriledi?
Saltanatty shara barysynda Qasym-Jomart Toqaev halyqaralyq pán olimpiadalarynda júlde alǵan oqýshylar men stýdentterge qarjylai syiaqysy bar sertifikattar tabystady.
Syiaqy mólsheri:
- Altyn medal – 1500 AEK;
- Kúmis medal – 1000 AEK;
- Qola medal – 500 AEK.
Prezident sonymen qatar jas daryndardy daiyndaǵan ustazdarǵa alǵys bildirip, olardyń eńbegi memleket tarapynan eskeriletinin aitty.
Toqaev Qazaqstanda daryndy jastarǵa qoldaý kórsetile beretinin atap ótti. Onyń aitýynsha, bilim men ǵylym, innovatsiia jáne ozyq tehnologiialar jahandyq básekede eldiń alǵa jyljýy úshin mańyzdy.
«Bilim men ǵylym, innovatsiia men ozyq tehnologiia – búgingi dáýirdiń basty qarýy. Jahandyq básekede bilimdi, ziiatker elder ǵana alǵa shyǵady. Sondyqtan men sizderdi «Qazirgi zamannyń naǵyz batyrlary» dep sanaimyn», – dedi Prezident.
