Máskeýde qaza tapqan qazaqstandyq stýdent Tomiris Baisafanyń anasynyń advokaty Evgenii Iavorskii aiyptalýshy Mýrtýzali Medjidovty Qazaqstanda sottaýǵa ruqsat alýdy qalaidy, - dep habarlaidy Tengrinews.kz.
Evgenii Iavorskii Qazaqstannyń bas prokýratýrasyna tiisti ótinishpen júginýdi josparlap otyrǵanyn málimdedi.
"Men buny basqa qazaqstandyq advokattarmen talqyladym, pikirler ekige bólindi. Tehnikalyq turǵydan bul múmkin, biraq bul úshin saiasi erik qajet. Prokýratýraǵa habarlaspas buryn, biz jurtshylyqtan qoldaýdy suraimyz. Másele - óte mańyzdy", - dedi advokat Evgenii Iavorskii.
Advokattyń aitýynsha, eger zardap shekken tarapty qoǵam qoldasa, el basshylyǵynyń osy baǵytta sheshim qabyldaýǵa múmkindigi bolady.
"Biz ótinish jazyp jatyrmyz. Qyzdyń óltirgenin dáleldeitin meditsinalyq zertteýler bar, basqa da birqatar dálel qolymyzda. Ol jaqtaǵy yqpaldy ata-ananyń, Reseidegi sybailas jemqorlyq shemalarynyń jolyn kese almadyq. Basqa el bolǵandyqtan qyzdyń anasy eshqandai túsinistik pen qoldaý tappai otyr", - dep qosty ol.
Evgenii Iavorskiidiń aitýynsha, mundai tájiribe basqa elderde bar.
"Nelikten biz azamattarymyzdy qorǵaý úshin mundai tájiribeni engize almaimyz? Biz qoǵamnyń qoldaýyna muqtajbyz. Eger jai ǵana ótinish jazsaq, bul másele jyly jabylyp qala ma dep qorqamyz", - dep qorytyndylady advokat.
Buǵan deiin Máskeýdegi sot Tomiris Baisafany óltirdi dep aiyptalǵan Daǵystannyń burynǵy joǵary laýazymdy sheneýniginiń uly Mýrtýzali Medjidovty aqtap alǵan bolatyn.
Marqumnyń anasy Janna Ahmetova da buǵan deiin Mýrtýzali Medjidovtyń Qazaqstanda sottalýyn qalaitynyn málimdegen bolatyn.
