Parlament Májilisinde agrarlyq máseleler komiteti agrarlyq ǵylym, bilim jáne óndiristi integratsiialaý máseleleri boiynsha otyrys ótkizip jatyr, dep habarlaidy QazAqparat.
Otyrysta otandyq agrarlyq ǵylym jaily Ulttyq agrarlyq ǵylymi bilim berý ortalyǵynyń basqarma tóraǵasy Tóleýtai Raqymbekov baiandama jasady. Onyń aitýynsha, ortalyq agrarlyq ǵylymǵa taldaý jasai otyryp, ózge elderdiń tájiribesin zerttep, negizgi máselelerdi aiqyndap kelgen.
«Álemdegi agrarlyq derjavalar sanatyndaǵy elderdiń aýyl sharýashylyǵyndaǵy innovatsiialyq júieniń uiymdastyrýshylyq sipaty birdei ári ol úsh bloktan turady. Alǵashqy blok – ǵylymi bilim berý mekemeleri, iaǵni ǴZI men ýniversitetter. Ondai oqý-zertteý oryndary bizde de bar. Ekinshisi – bilimdi taratý júiesi (ekstenshn). Bul turǵyda biz bilim berý ortalyqtaryn qurý jumysyn 2008 jyly bastadyq. Úshinshi blok – innovatsiialardy qoldaý servisteri. Olardyń qataryna kommertsiialandyrý keńseleri, transfertter men venchýrlyq qorlar jatady. Bul turǵyda biz jeńilip turmyz», - deidi Tóleýtai Raqymbekov.
Ortalyq basshysynyń aitýynsha, máselen Argentina aýyl sharýashylyǵy ministrliginiń Ulttyq agrarlyq tehnologiialyq institýty men Qazaqstannyń Ulttyq agrarlyq ǵylymi bilim berý ortalyǵyn salystyrýǵa múlde kelmeidi. Argentinadaǵy atalmysh institýttyń quramynda 4 ǴZI, 47 tájiribeli stantsiia men 320 bilim taratý ortalyǵy bar.
«Osydan baryp, bizdegi agrarlyq ǵylymnyń basty máselesi – bilim berý, transfert pen kommertsiialyq tehnologiialardy usyný boiynsha uiymdastyrý jumysynyń álsizdigi ekenin ańǵaramyz. Sondai-aq ǵylymdy qarjylandyrýda aitarlyqtai disproportsiia bar: bizde ǵylymi zertteý jumystaryna qarajattyń 90 paiyzy, al tájiribe men konstrýktorlyq jumysqa tiisinshe 10 paiyzy jumsalsa, transfert pen kommertsiialandyrýǵa múlde aqsha bólinbeidi. Álemdik tájiribege súiensek, bul rette qarajat bárine birdei – 30-35 paiyz mólsherinde aýdarylady», - deidi ol.
Tóleýtai Raqymbekov sonymen qatar ǵalymdardyń institýt basshylaryna táýeldiligi de ózekti másele týyndatatynyn aityp ótti. Institýttardyń basshylyǵy men tájiribeli sharýashylyqtardyń ǵylymi jáne kommertsiialyq saladaǵy mamandarmen kelispeýshiligi de isti ilgeri bastyrmai turǵan kórinedi.
