Nur-Sultan qalasy kásipodaqtar ortalyǵynyń tóraǵasy Tólegen Qunádilov QR Prezidenti Qasym-Jomart Toqaevtyń Parlament Májilisiniń jalpy otyrysynda jasaǵan málimdemesine pikir bildirdi, dep habarlaidy QazAqparat.
«QR Prezidenti Qasym-Jomart Toqaev Parlament Májilisiniń jalpy otyrysynda negizgi reformaǵa toqtaldy. Jaqynda halyq arasynda qyzý talqyǵa túsken ýtildik alym jinaýǵa qatysty máseleni qarady. Kásipodaq qyzmetkerleri retinde Memleket basshysynyń halyqtyń tabysyn arttyrýǵa baǵyttalǵan barlyq quraldar men tetikterdi qarastyratyn áleýmettik kodeksti ázirleý men qabyldaý týraly tapsyrmasy biz úshin mańyzdy boldy. Sonymen qatar, ol jumyssyzdyq deńgeiin tómendetý týraly aitty. Ásirese jastar arasynda. Biz seriktestik tarap retinde óz kezegimizde áleýmettik kodekske sáikes júzege asyrý tetikterin jetildirý boiynsha birqatar usynystar daiyndadyq jáne áli de usynýǵa daiynbyz», - dedi Tólegen Qunádilov.
Sonymen qatar, spiker jastar tájiribesine toqtaldy.
«Joǵary oqý ornyn nemese orta arnaýly oqý oryndaryn bitirgen jastarda jumysqa ornalasý máselesi jii týyndaidy. Memlekettik «Jastar tájiribesi» baǵdarlamasy bul problemany sheshýge aitarlyqtai kómek boldy. Desek te, ol jetkiliksiz, jalaqy deńgeii de sáikes kelmedi. Búgin Prezident jastar tájiribesine grant bólý kerektigin aitty. Bul - jumys isteitin jastar úshin tamasha múmkindik jáne áleýmettik lift», - dep qosty ol.
Tólegen Qunádilov Qasym-Jomart Toqaevtyń memlekettik organ basshylary óńirlerge turaqty túrde shyǵyp, oblys ákimderi ár eldi mekenniń turǵyndarymen turaqty túrde kezdesýler ótkizip turýy kerek degen bastamasyn qoldady.
«Sheneýnikter, ákimder halyqpen únemi keri bailanys jasap, halyqqa shyǵyp, olarmen tildesýleri kerek. Memlekettik saiasatty, usynystardy jetkizýleri tiis dep oilaimyn. Bul bolashaqta búkil halyqtyń ómir súrý sapasy men ál-aýqatyn jaqsartady», - dedi ol.
