Belgili ǵaryshker Toqtar Áýbákirov "Altyn dala" rezervatyna barǵanyn, biraq zańsyz ań aýlamaǵanyn málimdedi, dep habarlaidy "Astana" telearnasy.
Jýyrda biznesmen Batyr Seikenov áleýmettik jelide Toqtar Áýbákirovti Qostanai oblysyndaǵy "Altyn dala" rezervatynyń aýmaǵynda zańsyz ań aýlady dep aiyptady.
Ǵaryshker Torǵai jaqqa barǵanyn jasyrmady. Biraq ań atpaq túgili qolyma myltyq alǵan joqpyn dep otyr.
"Men barǵanmyn. Ákim de biledi, bári de biledi. Qolyma myltyq ta alǵan joqpyn. Aýmaqtan ary qarai kirip óttim. Sonyń aýmaǵyna kirdi dep oilaǵan ǵoi ózi. Sodan keiin endi ne isteý kerek? Kóterý kerek bar máseleni, kóterip bárin aiqai-shý jasaǵan. Óz obaly ózine... Men oǵan mán bergim kelmeidi", - dedi Áýbákirov.
Ǵaryshker Batyr Seikenovti jaqsy biletinin, tipti kezinde oǵan qoldaý kórsetip, qoltyǵynan demegenin aitty.
Al "Altyn dala" rezervatynyń basshylyǵy Toqtar Áýbákirovty óz aýmaǵynda kórmegenin málimdedi.
"Men ózim eshkimdi de kórgen joqpyn. Toqtar Áýbákirovti de kórgen joqpyn. Men nege ótirik aitýym kerek? Kórgen joqpyn, bir-aq aýyz sóz. Bizdiń aýmaqqa eshkimge kirýge bolmaidy. Ruqsat joq. Men sodan basqa eshteńe aitpaimyn", - dep jaýap berdi rezervat direktorynyń mindetin atqarýshy Dúiseǵali Aitbaev telearna tilshisine.
Buǵan deiin kásipker Batyr Seikenov jelidegi paraqshasynda Toqtar Áýbákirovtiń Torǵai dalasynda zańsyz ań aýlaǵanyn jazdy.
Qazaqstannyń ekologiia ministrligi áleýmettik jelidegi jazbaǵa qatysty túsinikteme berdi. Vedomstvonyń aqparatynsha, Áýbákirov biyl "sany retteýge jatatyn janýarlar túrlerin (qasqyr) alý" qyzmetin alýǵa úsh ret ótinim bergen. Alaida ótinish iesine bul aýmaqta ań aýlaýǵa ruqsat berilmegen.
"Brakonerlik faktileri týraly habarlanǵannan keiin rezervatta mobildi top quryldy, onda reidtik is-sharalar ótkiziledi. Qazirgi ýaqytta bóten adamdar baiqalmaǵan, biraq rezervat aýmaǵynan kirý jáne shyǵý izderi tabyldy", - dedi ministrlikten.
Qostanai oblysyndaǵy "Altyn dala" rezervaty erekshe qorǵalatyn tabiǵi aýmaqqa jatady. Ol jerde ań aýlaýǵa zańmen tyiym salynǵan. Sondyqtan mundai aýmaqtarda ań aýlaý áreketteriniń kez-kelgen kórinisi brakonerlik bolyp sanalady.
Qylmystyq kodekske sáikes, erekshe qorǵalatyn tabiǵi aýmaqta zańsyz ań aýlaǵany úshin múlkin tárkilei otyryp, 3 jyldan 6 jylǵa deiin bas bostandyǵynan aiyrý jazasy kózdelgen.
