Qazaqstandyq ǵaryshker Toqtar Áýbákirov koronavirýs juqtyryp, Nur-Sultan qalalyq juqpaly aýrýlar aýrýhanasyna jatqyzyldy, - dep habarlaidy "Ult aqparat" Prezident Is basqarmasynyń meditsinalyq ortalyǵy aýrýhanasynyń baspasóz qyzmetine silteme jasap.
Áýbákirov 21 tamyzda Prezident Is basqarmasynyń meditsinalyq ortalyǵy aýrýhanasyna densaýlyq jaǵdaiyn aityp júgingen. Ol jótel, tersheńdik jáne jalpy álsizdik baryn aitqan. Onyń úiine barǵan jedel járdem qyzmetkerleri PTR-taldaýyna úlgi alǵan. Nátije oń bolǵan.
Dárigerler Toqtar Áýbákirovke retsept jazyp, emdeý boiynsha usynystar bergen.
"Naýqastyń aitýynsha, bul altynshy kún. Ol "Sýmamed" preparatyn óz betinshe qabyldaǵan. Aýrýhanaǵa meditsinalyq kómekke júginbedi. 23 tamyzda Prezident Is basqarmasynyń meditsinalyq ortalyǵy gospitaliniń jyljymaly brigadasynyń dárigerleri úide keýde segmentiniń tomografiiasyn jasap, synama nátijesi boiynsha ony Nur-Sultan qalalyq juqpaly aýrýlar aýrýhanasyna jatqyzýǵa jiberdi. Naýqas aýrýhanaǵa jatýdan bas tartty", - delingen habarlamada.
24 tamyzda tańerteń dárigerler Toqtar Áýbákirovpen sóilesip, ony juqpaly aýrýlar ortalyǵyna barýǵa kóndirgen. Ol ortasha aýyr dárejedegi COVID-19 juqtyrý, eki jaqty polisegmental pnevmoniia KT-1 diagnozymen aýrýhanaǵa jatqyzylǵan.
Baspasóz qyzmeti málimetinshe, Áýbákirov vaktsina saldyrǵan. Ol vaktsinanyń ekinshi komponentin 17 sáýirde alǵan.
Toqtar Áýbákirov 1991 jyly tarihta ǵaryshty baǵyndyrǵan birinshi qazaqstandyq boldy. Ol KSRO-nyń 72-shi jáne sońǵy ǵaryshkeri, Qazaqstan Áskeri áýe kúshteri general-maiory. 27 shildede ol 75 jasqa tolǵan bolatyn.
