Tokiodaǵy Olimpiada jáne Paralimpiada oiyndarynyń bastalýyna segiz ai qalǵanda Olimpiada stadionynyń qurylysy aiaqtaldy, dep habarlaidy "Ult aqparat" UOK saityna silteme jasap.
Saltanatty rásimge Japoniianyń premer-ministri Sindzo Abe, Tokio gýbernatory Iýriko Koike jáne sáýletshi Kengo Kýma men BAQ ókilderi qatysyp, Olimpiada oiyndarynyń belgisi bolatyn nysandy kórip shyqty.
Olimpiada jáne Paralimpiada oiyndarynyń ashylý jáne jabylýy ótetin, sondai-aq fýtbol matchtaryn ótkizetin oryn kórermenderge umtylmas áser qaldyratyny anyq.
«Biz búkil álemniń sportshylaryn 2020 jyldyń 24 shildesinde ótetin Olimpiada jáne 2020 jyldyń 25 tamyzynda bolatyn Paralimpiada oiyndarynyń ashylý saltanatynda dúniejúzi kóz tigetin Tokio 2020 oiyndaryn osy stadionda kóretinimizge qýanyshtymyz», - dedi Tokio 2020 Olimpiada oiyndarynyń uiymdastyrý komitetiniń bas direktory Toshiro Mýto.
Bul orynnyń jobasyn qurastyrǵan tanymal sáýletshi Kengo Kýma negizgi basymdyqty ekologiialyq mánge bergen. Osyny eskere otyryp, stadion ainalasyndaǵy tabiǵatqa, onyń ishinde Meidji Tszin ǵibadathanasynyń janyndaǵy úlken jasyl aimaqqa sáikes kelýi kerek ekenine mán bergen. Sondyqtan Kýma ǵimarat «jandy aǵash» dep ózi ataǵan aǵashtar men taldardan turýy kerek dep sheshken.
Stadion aýmaǵynda 47 myńnan astam ortasha jáne alasa aǵash otyrǵyzyldy.
Olimpiada stadionynda 2020 jyldyń 1 qańtarynda JFA fýtboldan Japoniia imperatorynyń 99-shy kýbogy ótedi.
