Qazaqstan Respýblikasynyń Memlekettik hatshysy Qyrymbek Kósherbaev Tokioda ótken XXXII jazǵy Olimpiadanyń júldegerlerimen jáne olardyń bapkerlerimen kezdesip, Prezident Qasym-Jomart Toqaevtyń atynan memlekettik nagradalar men qarjylai sertifikattaryn tabystady, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaevtyń Jarlyǵymen Eldos Smetov III dárejeli «Barys» ordenimen, Zýlfiia Chinshanlo II dárejeli «Dostyq» ordenimen, Qamshybek Qonqabaev, Sáken Bibosynov, Igor Son, Sofia Berýltseva, Darhan Asadilov, Nurislam Sanaev «Qurmet» ordenimen marapattaldy.
Saltanatty is-sharaǵa barlyq júldeger men bapkerler, Premer-Ministrdiń orynbasary Eraly Toǵjanov, Prezident Ákimshiligi Basshysynyń birinshi orynbasary Dáýren Abaev, Mádeniet jáne sport ministri Aqtoty Raiymqulova qatysty.
«Ardaqty áleýmet, biylǵy Olimpiada sport tarihyndaǵy airyqsha báseke bolǵany anyq. Búkil álem alapat indetpen kúresip jatqanda jarysty uiymdastyrý ońaiǵa soqqan joq. Sportshylardyń saiysqa daiyndyǵy da birshama ózgerdi. Olimpiada ýaqyty 1 jylǵa keiinge shegerildi. Osyndai syndarly sátte synǵa túsken sizderdiń erik-jigerlerińizdi erekshe atap ótken jón. Olimpiadanyń birinshi kúni Eldos Smetov alǵashqy júldeni qorjynǵa salsa, jarystyń sońyna qarai Sofia Berýltseva ulttyq quramnyń Tokiodaǵy joryǵyn túiindedi. Aýyr atletterimiz Igor Son men Zýlfiia Chinshanlo, boksshylarymyz Sáken Bibosynov pen Qamshybek Qońqabaev, balýan Nurislam Sanaev pen taekvondoshy Darhan Asadilov jankúierlerdi júldemen qýantty. Sizder memlekettiń namysy men abyroi, mereii men mártebesin synǵa túsken jahandyq jarysta jan aiap qalǵan joqsyzdar. Qansha jyldyq eńbekpen kelgen júldelerińiz qutty bolsyn», - dedi Qyrymbek Kósherbaev saltanatty sharada.
Sondai-aq, jiynda Memlekettik hatshy Tokio Olimpiadasy elimizdegi sport salasynyń shynaiy bet-beinesin anyq kórsetkenin atap ótip, sport salasyna shuǵyl reforma qajet ekenin aitty. Birde-bir sportshymyzdyń altyn ne kúmis júldege qol jetkize almaýy eldigimizge syn bolǵanyna toqtaldy.
– Eń áýeli, balalar men jasóspirimderdiń dene shynyqtyrýmen, sportpen ainalysýyn qamtamasyz etý qajet. Óskeleń urpaqtyń sportpen shuǵyldanýyna jaǵdai jasamai, iri jarystarda jetistikke jetemiz deý ábestik. Sondyqtan elimizdiń barlyq aimaqtaryndaǵy sport mektepteri men úiirmelerdiń jaǵdaiyna tereń taldaý jasalyp, olardy qoldaýdyń keshendi jospary ázirlenýi tiis. Halyqtyń salaýatty ómir saltyn ustanyp, buqaralyq sportpen ainalysýyn damytqan durys. Sportpen shuǵyldanatyn halyqtyń sanyn arttyrsaq, odan sapa shyǵady. Bul da kezek kúttirmei, jedel qolǵa alatyn sharýanyń negizgisi, – dedi Qyrymbek Eleýuly.
Memlekettik nagradamen qatar, jeńimpaz sportshylar men olardyń jattyqtyrýshylaryna qarjylai syiaqy tabystaldy. Atap aitqanda, Olimpiada júldegerlerine 31 mln teńge, al jattyqtyrýshylarǵa 25 mln teńge kóleminde syiaqy taǵaiyndaldy.
Aita ketsek, buǵan deiin Memleket basshysynyń Qazaqstan Respýblikasynyń memlekettik nagradalarymen nagradtaý týraly Jarlyǵynyń shyqqany habarlanǵan bolatyn.
