Tokio Olimpiadasynyń uiymdastyrý komiteti bokstan kelesi jyly ótetin Olimpiada oiyndarynyń kestesin jariialady, dep habarlaidy "Ult aqparat".
QR Boks federatsiiasy habarlaǵandai, Tokio Olimpiadasynyń uiymdastyrý komiteti boks básekesiniń jarys kestesin resmi túrde bekitti.
Olimpiada oiyndarynyń basty dodalarynyń biri boks básekesi 2020 jyldyń 25 shildesi men 9 tamyzy aralyǵynda «Kokýgikan Arenada» ótpek.
Birinshi jarys kúni sharshy alańda jartylai orta, jartylai aýyr jáne aýyr salmaqtaǵy erler, sondai-aq, jartylai jeńil salmaqtaǵy áielder shyǵady.
Al finaldyq básekeler 4 tamyzda bastalady. Týrnirdiń sońǵy jarys kúni Tokio oiyndary aiaqtalatyn kúnge tuspa-tus keledi.
Esterińizge sala keteiik, osyǵan deiin Aziia elderi úshin biliktilik týrniri qańtar aiynda Qytaida, al ekinshi álemdik týrnir mamyr aiynyń basynda Olimpiada oiyndary ótetin Japoniiada ótkiziletini týraly habarlaǵan bolatynbyz.
Qazaqstandyq boksshylar qatysatyn Aziialyq biliktilik týrnirine erler arasynda 41 litsenziia jáne áielder arasynda 22 litsenziia oinatylady. Erler arasynda olar bylaisha bólinedi: 52 kg-ǵa deiin, 57 kg-ǵa deiin jáne 63 kg-ǵa deiin salmaq sanattarynda alty kvota, 69 kg-ǵa deiin, 75 kg-ǵa deiin jáne 81 kg-ǵa deiin salmaq sanattarynda bes kvota.
Al, áielder arasynda kontinenttik týrnirde litsenziialar kelesidei bólinetin bolady: 51 kg deiingi salmaq sanatynda alty kvota jáne qalǵan salmaq sanatynda tórt kvota (57 kg deiin, 60 kg deiin, 69 kg deiin, 75 kg deiin).
Álemdik irikteý týrnirine kontinentaldyq jarystarda litsenziia ala almaǵan boksshylar qatysady. Olarǵa erler arasynda Tokioda ótetin Olimpiadaǵa 31-35 kvota jáne áielder arasynda 19-21 kvota bólinedi.
