Memleket basshysy Qasym-Jomart Toqaev Qyrǵyz Respýblikasynyń Prezidenti Sooronbai Jeenbekovpen telefon arqyly sóilesti, dep habarlaidy Aqordanyń baspasóz qyzmeti.
Memleketter basshylary koronavirýs indetiniń taralý jaǵdaiynda saýda-ekonomikalyq yntymaqtastyqtyń joǵary qarqynyn saqtaýǵa baǵyttalǵan birlesken sharalardy talqylady.
S.Jeenbekov Qyrǵyzstan azamattarynyń eline oralýyna, sondai-aq, qazaq-qyrǵyz shekarasy arqyly júk tasymalyna kórsetken kómegi úshin Qazaqstan Prezidentine rizashylyǵyn bildirdi. Prezident Q.Toqaev áriptesine Qazaqstannyń baýyrlas qyrǵyz halqyna odan ári kómek kórsete beretinin jetkizdi.
Sonymen qatar áńgimelesý barysynda elimizdiń ońtústik óńirlerindegi aldaǵy egin naýqany kezinde sý resýrstaryn birlesip paidalaný máselesi talqylandy.
Barlyq máseleni jedel sheshý úshin eki eldiń Úkimetterine tiisti tapsyrmalar berildi.
Telefon arqyly sóilesýge qyrǵyz tarapy bastamashy boldy.
