Memleket basshysy Ishki ister ministrliginiń basshylyq quramymen keńes ótkizdi, dep habarlaidy Aqorda.
Jiynda Qasym-Jomart Toqaev Erlan Turǵymbaevty Ishki ister ministri qyzmetinen bosatý jáne Marat Ahmetjanovty vedomstvo basshylyǵyna taǵaiyndaý týraly jarlyqtarǵa qol qoiǵanyn habarlady.
Prezident qańtar oqiǵasy kezinde arandatýshylar men radikaldy kúshterdiń soqqysyna birinshi bolyp ishki ister organdarynyń qyzmetkerleri keýdesin tosqanyn atap ótti.
Onyń aitýynsha, kóptegen qyzmetker óziniń mindetine adal bolyp, quqyqtyq tártip pen azamattardyń qaýipsizdigin qamtamasyz etý kezinde tabandylyq pen batyldyqtyń úlgisin kórsetti.
Budan bólek Prezident tergep-tekserý jumystary barysynda zańdylyqty qamtamasyz etip, azamattardyń quqyǵyn saqtaý qajet ekenine erekshe nazar aýdardy.
– Osy qaiǵyly jaǵdai ishki ister organdary júiesinde kemshilikterdiń kóp ekenin kórsetti. Ony ashyq aitý kerek. Ótken isten barynsha sabaq alyp, mundai oqiǵaǵa jol bermeý úshin barlyq olqylyqtardy anyqtap, joiý kerek. Sondai-aq qylmyskerler men arandatýshylardyń bárin taýyp, zańǵa sáikes jaýapqa tartý qajet. Biraq ruqsat etilmegen tergep-tekserý ádisterine múlde jol bermeý kerek, – dedi Memleket basshysy.
Qasym-Jomart Toqaevtyń pikirinshe, ishki ister organdary quqyqtyq tártip pen azmattarymyzdyń qaýipsizdigin qamtamasyz etýdiń kepili bolýǵa tiis.
Memleket basshysy jańa ministrge azamattardyń quqyqtaryn qorǵaý deńgeiin arttyrýǵa jáne zańdy múddelerin saqtaýǵa, halyqtyń politsiiaǵa degen senimin nyǵaitýǵa tapsyrma berdi. Sondai-aq ishki ister organdaryn reformalaý, sonyń ishinde politsiia qyzmetine servistik model engizý, qyzmetkerlerdi irikteýdiń sapasy men daiyndyǵyn kúsheitý jumystaryn jalǵastyrý qajet ekenin aitty.
