Prezident Qasym-Jomart Toqaev Memlekettik nagradalar men syilyqtar tapsyrýǵa arnalǵan saltanatty rásimge qatysty, dep habarlaidy "Ult aqparat" Aqordaǵa silteme jasap.
Memleket basshysy óz sózinde saltanatty jiynǵa qatysýshylardy Qazaqstan Táýelsizdiginiń 30 jyldyǵymen quttyqtap, bul merekeniń ult mereiin ósiretin ulyq meiram ekenin atap ótti.
– Biz tarih turǵysynan alǵanda qysqa merzim ishinde jańa Qazaqstannyń negizin qaladyq. Tuǵyry berik, ekonomikasy qýatty, bedeli biik memleketke ainaldyq. Munyń bári, eń aldymen, Elbasy Nursultan Ábishuly Nazarbaevtyń kóregen saiasatynyń jemisi. Sonymen birge, búkil halqymyzdyń eren eńbeginiń nátijesi. Kez-kelgen halyqtyń tabysqa jetýi azamattaryna bailanysty. Bul – ómirdiń zańy. Adam kapitaly myqty memleket barlyq qiyndyqty eńsere alady. Táýelsizdik kezeńinde halqymyz eldiktiń biregei úlgisin kórsetti. «Eńbek – yrystyń bulaǵy, baqyttyń shyraǵy» dep beker aitylmaǵan. Shyn máninde, bizdiń búgingi jetistigimiz – barsha halqymyzdyń ortaq jeńisi. Jańa Qazaqstandy órkendetýge azamattarymyzdyń kóbi súbeli úles qosty. Búgingi mereili sátte elimizdiń barsha azamattaryna tabandy eńbegi úshin zor alǵys aitamyn, – dedi Prezident.
Qasym-Jomart Toqaev Táýelsizdiktiń 30 jyldyǵy kópǵasyrlyq memlekettiligimizdiń mańyzdy kezeńi jáne zamanaýi Qazaqstan jylnamasyndaǵy aitýly beles ekenine toqtaldy. Onyń aitýynsha, osy jyldar ishinde elimiz zor jetistikterge qol jetkizgen, kúrdeli syn-qaterlerdi eńsergen úlken joldan ótti.
– El azamattarynyń basym kópshiligi ózderiniń qajyrly eńbegimen qýatty ári damyǵan memleket qurý isine eleýli úles qosyp keledi. Búgin ózderińizdi marapattai otyryp, Qazaqstandy kórkeitýge úles qosqan barlyq azamatqa rizashylyq bildiremiz. Sizder naǵyz otanshyldyqtyń, kásibi bilik pen adal eńbektiń ozyq úlgisin kórsettińizder. Óskeleń urpaq ózderińizge qarap boi túzeidi. Osydan bir jyl buryn men úlken mereitoidy shýsyz, dańǵazasyz, ysyrapsyz naqty jumystarmen atap ótý qajettigi týraly aittym. Táýelsizdigimizdiń 30 jyldyǵynda jańa, aýqymdy reformalar qolǵa alyndy. Sondyqtan, bul jyldy nátijeli boldy deýge tolyq negiz bar. Biz ekonomikany jáne áleýmettik salany jan-jaqty jańǵyrtyp jatyrmyz. Indetke qaramastan, memleket otandyq bizneske qoldaý kórsetýde, – dedi Memleket basshysy.
Prezident ekonomikany jáne áleýmettik salany jańǵyrtý máselesine, sonyń ishinde ónerkásiptiń, aýyl sharýashylyǵynyń, qurylys salasynyń, qarjy sektorynyń qarqyndy damýyna nazar aýdardy. Óńirlerde iri infraqurylymdyq jobalar júzege asyrylyp jatyr. Bilim berý jáne densaýlyq saqtaý salalarynda keshendi transformatsiia jalǵasýda. Memleket zeinetaqy, járdemaqy jáne eńbekaqy kólemin turaqty túrde arttyryp, óziniń áleýmettik mindettemelerin oryndaýda.
– Memlekettik basqarý júiesinde aýqymdy ózgerister boldy. Men halyqtyń turmys sapasyn arttyrýǵa jáne elimizdiń básekege qabilettiligin kúsheitýge baǵyttalǵan 10 ulttyq jobany bekittim. Qoǵamdyq-saiasi salada eleýli ózgerister jasalýda. Men usynǵan saiasi reformalar toptamasy kezeń-kezeńimen júzege asyrylyp jatyr. Biz Táýelsiz Qazaqstan tarihynda alǵash ret aýyl ákimderiniń tikelei sailaýyn ótkizdik. Biyl maýsym aiynda adam quqyqtary salasyndaǵy aldaǵy sharalar týraly Jarlyqqa qol qoidym. Bul qujat quqyq qorǵaý salasyn keshendi túrde jańǵyrtýǵa baǵyttalǵan. Qoǵamdyq dialogty birtindep damytý úshin naqty sharalar qolǵa alynyp jatyr. Munyń bári azamattarymyzdyń sheshim qabyldaý jáne memlekettik basqarý isine belsene qatysýyna jol ashady. Bizdiń maqsatymyz – tiimdi memleket jáne ádiletti qoǵam qurý. Bul strategiialyq baǵyt ózgermeidi. Aldymyzda halyqtyń ál-aýqatyn odan ári arttyrý, qasietti Táýelsizdigimizdi nyǵaitý jónindegi aýqymdy mindetter tur, – dedi Qasym-Jomart Toqaev.
Memleket basshysy Parlamenttiń qos palatasynyń tóraǵalaryna, Premer-Ministrge jáne Memlekettik hatshyǵa Táýelsizdik kúni qarsańynda jergilikti turǵyndarmen kezdesý úshin aimaqtarǵa baryp, eńbegimen erekshelengen azamattarǵa memlekettik nagradalar tabystaý jóninde bergen tapsyrmasy týraly aitty.
Qasym-Jomart Toqaevtyń sóilegen sóziniń tolyq mátinimen myna silteme arqyly tanysýǵa bolady.
