Foto: Akorda.kz
Memleket basshysy BUU-nyń Ornyqty damý maqsattary jónindegi sammitine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaev Majarstan Prezidenti Katalin Novakpen birge BUU-nyń «Ornyqty damý maqsattaryna (ODM) qol jetkizý jolyndaǵy progresti jedeldetýdiń negizgi ótpeli protsesterine qatysty aýqymdy is-qimyldardy jandandyrý» atty Kóshbasshylar dialogynyń birinshi sessiiasynda tóraǵalyq etti.
Memleket basshysy óz sózinde Birikken Ulttar Uiymynyń 2030 jylǵa deiingi kún tártibi búgingi óskeleń urpaqtyń jarqyn bolashaq qurýyna berilgen bir ǵana múmkindik ekenin atap ótti.
– Geosaiasi qaqtyǵystarǵa bailanysty shielenise túsken qazirgi jahandyq syn-qaterler bizdiń ujymdyq kúsh-jigerimizge nuqsan keltirip otyr. Bul kedergilerdi eńserýge jekelegen memlekettiń shamasy jetpeidi. Álemdik qoǵamdastyqtyń birliginiń arqasynda ǵana eleýli jetistikterge qol jetkize alamyz, – dedi Qasym-Jomart Toqaev.
Prezidenttiń aitýynsha, Qazaqstan úshin Ornyqty damý maqsattaryna qol jetkizý – ulttyq basymdyq.
– Ornyqty damý qaǵidattary bizdiń negizgi ulttyq strategiialarymyz ben baǵdarlamalarymyzdyń ózegine ainaldy. Búginde ornyqty bolashaqqa belsendi túrde investitsiia quiyp otyrmyz. Memleket biýdjetiniń 80 paiyzy ornyqty damý maqsattaryna sai keledi. Biz tegin bilim alýdyń jáne densaýlyq saqtaýdyń barshaǵa qoljetimdi bolýyn qamtamasyz etemiz. Jańa Áleýmettik kodekste halyqtyń osal toptaryn qorǵaý sharalary kúsheitildi, – dedi Memleket basshysy.
Prezidenttiń pikirinshe, barshaǵa ortaq ornyqty bolashaqqa qol jetkizý úshin shuǵyl túrde birlesken is-qimyldar qajet. Osyǵan bailanysty Memleket basshysy birqatar usynys aitty.
– Ózara yntymaqtastyqty nyǵaitý úshin aimaqtyq deńgeide «Birtutas BUU» qaǵidatyn kúsheitý qajet. Sondyqtan biz Qazaqstanda Ortalyq Aziia men Aýǵanstan úshin Ornyqty damý maqsattary jónindegi Aimaqtyq hab qurýdy usynamyz. Ol BUU-nyń aimaqtaǵy jobalyq qyzmetin tiimdi úilestirýdi qamtamasyz etedi, – dedi Qasym-Jomart Toqaev.
Prezident sammitke qatysýshylarǵa halyqaralyq qarjy arhitektýrasyna tyń serpin berýdi usyndy. Onyń aitýynsha, ODM-ǵa qol jetkizý úshin qarjy júiesi tańdaýly ǵana elge emes, barlyq memleketke teńdei yqpal etýi qajet. Ekologiia, bilim berý jáne densaýlyq saqtaý salalaryndaǵy problemalardy sheshý úshin orasan zor qarjy kerek.
Qasym-Jomart Toqaev klimat, azyq-túlik jáne energetika daǵdarysy ornyqty damýǵa aitarlyqtai qaýip tóndiretinine toqtaldy.
– Biz BUU-nyń basshylyǵymen tehnikalyq qoldaý, ǵylymi zertteýler jáne qaýip-qaterlerdi baǵalaý salalaryndaǵy halyqaralyq yntymaqtastyqty nyǵaitýǵa tiispiz. Ornyqty damý salasyndaǵy maqsattar bárimiz úshin jarqyn álemge jol ashady. Biz birigýimiz jáne kúsh-jigerimizdi arttyrýymyz qajet. Qazaqstan BUU-nyń ornyqty damý salasyndaǵy tegeýrindi ári tiimdi rólin árdaiym jaqtaidy, – dedi Prezident.
Sonymen qatar sessiia barysynda Majarstan Prezidenti Katalin Novak, Horvatiia Prezidenti Zoran Milanovich, Qyrǵyzstan Prezidenti Sadyr Japarov, OAR Prezidenti Siril Ramafosa, Aýstriia Prezidenti Aleksandr Van der Bellen, Perý Prezidenti Dina Bolýarte, Gaiana Prezidenti Irfan Ali, Mikroneziia Prezidenti Ýesli Simina, Soltústik Makedoniia Prezidenti Stevo Pendarovski, Finliandiia Prezidenti Saýli Niinistio jáne basqalar sóz sóiledi.
