Foto: Akorda.kz
Hanoi qalasyna resmi saparmen kelgen Memleket basshysy Qasym-Jomart Toqaev Vetnam Prezidenti Vo Van Thyongpen kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Kelissózder aldynda Prezident saraiynda resmi qarsy alý rásimi ótti.
Eki el basshylaryna Qurmet qaraýyly rotasynyń bastyǵy raport bergen soń, Qazaqstan men Vetnamnyń memlekettik ánurandary oryndaldy. Qasym-Jomart Toqaev pen Vo Van Thyong bir-birine resmi delegatsiia múshelerin tanystyrdy.
Sodan keiin Qazaqstan men Vetnam prezidentteri kelissóz júrgizdi. Kelissóz barysynda saýda-ekonomikalyq, investitsiialyq, energetikalyq, kólik-logistikalyq, agroónerkásiptik jáne mádeni-gýmanitarlyq salalardaǵy yntymaqtastyqty damytý perspektivalary talqylandy.
Memleket basshysy qonaqjailyq kórsetkeni úshin Vo Van Thyongqa alǵys aityp, osy saparǵa basa mán beretinin atap ótti.
– Qazaqstan Prezidenti retinde Sizdiń elińizge alǵash ret saparmen kelip otyrmyn. Men bul saparyma basa mán beremin. Qazaqstanda Sizdiń elge jáne Vetnam halqyna zor qurmetpen qaraitynyn atap ótkim keledi. Vetnamnyń ekonomikalyq jetistikteri elderimizdiń yntymaqtastyǵyn odan ári nyǵaitýǵa berik negiz bolady. Biz eki memleket arasyndaǵy ekonomikalyq, saiasi qatynastarǵa basa mán beremiz jáne Vetnamnyń ekonomikalyq zor áleýetin jáne onyń halyqaralyq arenadaǵy bedelin joǵary baǵalaimyz, – dedi Qasym-Jomart Toqaev.
Prezident ótken jyldyń qorytyndysy boiynsha ózara saýda-sattyq jarty milliard dollardan asqanyna, biylǵy alty aidyń ózinde 600 million dollar bolǵanyna nazar aýdardy. Jyl sońyna deiin bul mańyzdy kórsetkishti 1 milliard dollarǵa deiin jetkizý josparlanyp otyr.
Memleket basshysy búgingi kelissózder ekijaqty qatynastardy damytýdyń jańa kezeńine jol ashatynyna senim bildirdi.
Óz kezeginde Vo Van Thyong eki el arasyndaǵy yntymaqtastyqty jandandyrý isin joǵary baǵalap, Qazaqstan men Vetnamnyń seriktestigin odan ári nyǵaitýǵa nietti ekenin jetkizdi.
– Sizdiń elimizge jasaǵan alǵashqy resmi saparyńyz eki memlekettiń dástúrli dostyq qarym-qatynasy men kópjaqty yntymaqtastyǵyn jandandyrýǵa tyń serpin beretinine senimdimin. Men Qazaqstanda saparmen boldym. Óte tamasha, ǵajap el, halqynyń qonaqjailyǵyna tánti boldym. Vetnam Qazaqstannyń damýyn jáne Sizdiń basshylyǵyńyzben Qazaqstan halqynyń jetken zor tabysyn jiti baqylap otyr. Sizdiń tájiribeńiz ben strategiialyq kóregendigińizdiń arqasynda Qazaqstan odan ári damyp, álemdegi jáne aimaqtaǵy turaqtylyqty saqtaýǵa eleýli úles qosatynyna senimdimin. Vetnam ult-azattyq kúresi men memlekettiń birigýine jáne qazirgi damýyna qazaq halqynyń kórsetken járdemin eshqashan umytpaidy ári alǵys aitady. Biz Qazaqstanmen aradaǵy dástúrli dostyq qatynasqa zor mán beremiz jáne elińizdi Ortalyq Aziiadaǵy mańyzdy seriktes sanaimyz, – dedi Vetnam Prezidenti.
Prezident Qasym-Jomart Toqaev áriptesi Vo Van Thyongty Qazaqstanǵa memlekettik saparmen kelýge shaqyrdy.
Kelissózder qorytyndysy boiynsha prezidentter Birlesken kommiýnike qabyldady. Sonymen qatar sapar aiasynda mynadai qujattarǵa qol qoiyldy:
1. Qazaqstan Respýblikasynyń Úkimeti men Vetnam Sotsialistik Respýblikasynyń Úkimeti arasyndaǵy saýda-ekonomikalyq yntymaqtastyqty jedel damytý jónindegi 2023-2025 jyldarǵa arnalǵan birlesken is-qimyldar jospary;
2. Qazaqstan Respýblikasynyń Úkimeti men Vetnam Sotsialistik Respýblikasynyń Úkimeti arasyndaǵy ulttyq pasporttardyń ielerin vizalyq talaptardan bosatý týraly kelisim;
3. Qazaqstan Respýblikasynyń Mádeniet jáne sport ministrligi men Vetnam Sotsialistik Respýblikasynyń Mádeniet, sport jáne týrizm ministrligi arasyndaǵy týrizm salasyndaǵy yntymaqtastyq týraly memorandým;
4. «Saýda saiasatyn damytý ortalyǵy» AQ (QazTrade) men Vetnamnyń saýdany damytýǵa járdemdesý agenttigi (VietTrade) arasyndaǵy saýdaǵa járdemdesý salasyndaǵy yntymaqtastyq týraly memorandým;
5. Qazaqstan Respýblikasy Syrtqy ister ministrliginiń Investitsiia komiteti men Vetnam Sotsialistik Respýblikasy Syrtqy investitsiia agenttigi arasyndaǵy yntymaqtastyq týraly memorandým;
6. «Qazposhta» AQ men Viet Post korporatsiia arasyndaǵy elektrondyq kommertsiiany damytý salasyndaǵy ózara túsinistik týraly memorandým;
7.Qazaqstan Respýblikasy Indýstriia jáne infraqurylymdyq damý ministrligi men VietJet Aviation arasyndaǵy ózara túsinistik týraly memorandým;
8. «QazMunaiGaz» UK» AQ men Sovico Group arasyndaǵy munai-gaz jobalaryna investitsiialar salasyndaǵy yntymaqtastyq boiynsha ózara túsinistik týraly memorandým;
9. «Qazaqstan Temir Joly» UK» AQ men Sovico Group kompaniiasy arasyndaǵy transportyq-logistikalyq infraqurylymdy damytý salasyndaǵy yntymaqtastyq jónindegi ózara túsinistik týraly memorandým;
10. Qazaqstan Respýblikasy Syrtqy ister ministrliginiń Investitsiia komiteti men Crystal Bay Tourism Group JSC arasyndaǵy ózara túsinistik týraly memorandým;
11 Microtech DFS Vietnam Company Limited pen Vela Corporation arasyndaǵy yntymaqtastyq týraly kelisim;
12. «Habar» Agenttigi» AQ men Vietnam Televesion arasyndaǵy ózara túsinistik týraly memorandým.
