Memleket basshysy Ulttyq qoǵamdyq senim keńesiniń músheleri Rahym Oshaqbaevpen jáne Qanat Sahariianovpen kezdesý ótkizdi, dep habarlaidy "Ult aqparat" Aqordnyń resmi saityna silteme jasap.
«Talap» qoldanbaly zertteýler ortalyǵynyń direktory Rahym Oshaqbaev Prezidentke ózi basqaryp otyrǵan ortalyqtyń jumysy týraly aitty, sondai-aq, otandyq analitikalyq ortalyqtardy damytý jónindegi usynystaryn ortaǵa saldy.
Budan bólek Memleket basshysyna jahandyq kompaniialarmen aradaǵy yntymaqtastyqtyń negizinde investitsiia tartý joldaryn, sondai-aq, aqsha-kredit saiasatyn jetildirýge baǵyttalǵan usynystar tanystyryldy.
Atameken Business telearnasynyń bas direktory Qanat Sahariianovpen áńgimelesý barysynda qazaqstandyq buqaralyq aqparat quraldarynyń básekege qabilettiligin nyǵaitý, aqparattyq saiasat salasyn retteitin zańnamany damytý máseleleri qarastyryldy. Qasym-Jomart Toqaev memlekettiń otandyq mass-mediaǵa qoldaý kórsete beretinine toqtalyp, kontent sapasyn arttyrý jáne qazaqtildi BAQ-tyń básekege qabilettiligin kúsheitý qajettigin aitty.
