Memleket basshysy UQShU Ujymdyq qaýipsizdik keńesiniń kezekten tys sessiiasyna qatysty, dep habarlaidy "Ult aqparat" Aqordaǵa silteme jasap.
Búgin elimizde qalyptasqan jaǵdaiǵa bailanysty Qazaqstan Prezidentiniń bastamasymen shaqyrylǵan Ujymdyq qaýipsizdik shart uiymy Ujymdyq qaýipsizdik keńesiniń kezekten tys sessiiasy beinebailanys rejiminde ótti.
Jiynǵa Qasym-Jomart Toqaevpen qatar Armeniianyń Premer-ministri Nikol Pashinian, Belarýs Prezidenti Aleksandr Lýkashenko, Resei Prezidenti Vladimir Pýtin, Tájikstan Prezidenti Emomali Rahmon, Qyrǵyzstan Ministrler kabinetiniń Tóraǵasy – Prezident Ákimshiliginiń Basshysy Aqylbek Japarov jáne UQShU Bas hatshysy Stanislav Zas qatysty.
Qazaqstan Prezidenti sessiia qatysýshylaryna elimizde qalyptasqan ahýal men ony turaqtandyrý úshin qabyldanyp jatqan sharalar týraly málimet berdi. Memleket basshysy UQShU boiynsha áriptesterine kórsetken kómekteri úshin rizashylyǵyn bildirdi.
– Shyn máninde, UQShU-ǵa múshe memleketterdiń biriniń qaýipsizdigin, turaqtylyǵy men tutastyǵyn qamtamasyz etý úshin Uiymnyń bitimgerlik kúshteriniń aýqymdy túrde jumyldyrylý jaǵdaiy birinshi ret bolyp otyr. Biz úshin UQShU boiynsha áriptesterimizdiń áskeri ǵana emes, moraldyq qoldaý kórsetýi de asa mańyzdy. Uiymǵa múshe memleketterdiń bári birtutas maidan bolyp, Qazaqstannyń úndeýin biraýyzdan qoldady, – dedi Qasym-Jomart Toqaev.
Prezident Uiymnyń budan paidaly ári jaqsy tájiribe alatynyn, osal tustar taldanyp, tiisti sheshim shyǵarylatynyn, retteýshi qujatqa túzetýler engiziletinin atap ótti.
– UQShU bedeldi áskeri-saiasi uiym retinde óziniń qajetti ári tiimdi ekenin kórsetti. Bul - memleketterimizdiń turaqtylyǵy men qaýipsizdigin qamtamasyz etetin naqty mehanizm, – dedi Memleket basshysy.
Sammit barysynda UQShU-ǵa múshe memleketter basshylary Qazaqstan Respýblikasyndaǵy jaǵdai jóninde pikir almasyp, elimizdiń basshylyǵy jasap jatqan is-áreketterdi qoldaitynyn aitty. Sondai-aq turaqtylyq pen konstitýtsiialyq tártipti qalpyna keltirýdiń mańyzdy ekenine nazar aýdardy. UQShU Bas hatshysy Stanislav Zas birlese qabyldaǵan sheshimderdiń júzege asyrylý barysy týraly baiandady.
Memleketter basshylary UQShU Ujymdyq bitimgerlik kúshteriniń Qazaqstandaǵy missiiasy aiaqtalǵansha turaqty bailanysta bolýǵa ýaǵdalasty.
Qasym-Jomart Toqaevtyń sóilegen sóziniń tolyq mátinimen myna silteme arqyly tanysýǵa bolady.
