Qazaqstan Túrki keńesi elderimen birlesip, gidroqurylymdar salý jobalaryna qatysýǵa daiyn. Bul týraly Túrki tildes memleketterdiń yntymaqtastyq keńesiniń beiresmi sammiti barysynda QR Prezidenti Qasym-Jomart Toqaev aitty, dep habarlaidy "Ult aqparat".
«Sý energetika salasy qatynastarymyzdyń taǵy bir quramdas bóligi. Óitkeni, sý máselesi bizdiń aimaqtaǵy óte mańyzdy, kúrdeli problemaǵa ainalyp otyr. Transshekaralyq sý resýrstaryn tiimdi ári ádil paidalaný elderimizdiń turaqtylyǵy men ósip-órkendeýiniń kepili. Osy oraida ózderińizben birlese gidroqurylymdar salý jobalaryna atsalysýǵa daiynbyz», - dedi Memleket basshysy.
QR Prezidenti pandemiia jańa tehnologiianyń kúndelikti ómirde qanshalyqty mańyzdy ekenin kórsetkendigine basa nazar aýdartty.
«Qazir tehnologiia túrli salaǵa jedel engizilýde. Sondyqtan memleketterimizdiń jasandy intelektini damytý, aýqymdy derekterdi taldaý, tsifrlandyrý, internet saýdasy siiaqty salalarda ortaq jobalardy júzege asyrýǵa shaqyramyn. Bul qadam innovatsiialardy igerýge jáne básekege qabilettiligimizdi arttyrýǵa múmkindik bereri sózsiz. Qazaqstanda bul sala basymdyqqa ie boldy. Elektrondyq úkimet tabysty jumys isteýde. Bank jáne qarjy júiesinde Fintec ozyq tehnologiialar men tsifrlyq sheshimder keń qoldanys tabýda. Biz osy salada sizdermen tájiribe almasýǵa ázirmiz», - dedi Qasym-Jomart Toqaev.
