QR Prezidenti Qasym-Jomart Toqaev Túrikmenstan Prezidenti Gýrbangýly Berdimuhamedovpen telefon arqyly sóilesti, dep habarlaidy Aqorda.
Kórshiles memleketterdiń Prezidentteri kóp josparly qazaq-túrikmen yntymaqtastyǵyn damytý perspektivalary, eki el arasyndaǵy dostyq qatynastar men strategiialyq seriktestikti nyǵaitý jaiynda jan-jaqty pikir almasty.
Qasym-Jomart Toqaev baýyrlas eki el halyqtarynyń múddesi úshin Qazaqstan Túrikmenstanmen kópjaqty bailanystardy odan ári damytýǵa daiyn ekenin málimdedi.
Gýrbangýly Berdimuhamedovtiń pikirinshe, Qazaqstan Túrikmenstannyń Ortalyq Aziiadaǵy negizgi seriktesi.
Prezidentter ózara saýda kólemin arttyrý, ónerkásip, aýyl sharýashylyǵy, energetika, kólik jáne logistika salalaryndaǵy jobalardy júzege asyrý maqsatymen Qazaqstan men Túrikmenstannyń kúsh biriktirýge daiyn ekenin rastady.
Taraptar eki el arasyndaǵy yntymaqtastyqqa qosymsha qarqyn berý úshin biyl Úkimetaralyq komissiia otyrysyn ótkizýge kelisti.
Qazaqstan Prezidenti ortaq kelisim bolǵan jaǵdaida, kezekti Ortalyq Aziia elderi basshylarynyń konsýltativtik kezdesýin Túrikmenstan astanasynda ótkizýdi qoldaitynyn jetkizdi. Budan bólek Qasym-Jomart Toqaev túrikmen eliniń basshysyna Qazaqstannyń Túrkitildes memleketterdiń yntymaqtastyǵy keńesinde kótergen bastamalaryn qoldaǵany, sondai-aq, Túrikmenstannyń Aziiadaǵy ózara yqpaldastyq jáne senim sharalary keńesine baqylaýshy retinde kirgeni úshin rizashylyǵyn bildirdi.
Gýrbangýly Berdimuhamedov Qasym-Jomart Toqaevty ekijaqty yntymaqtastyqtyń ózekti máselelerin talqylap, mańyzdy kelisimderge qol qoiý úshin Túrikmenstanǵa saparmen kelýge shaqyrdy.
Qazaqstan Prezidenti túrikmenstandyq áriptesine ákesiniń qaitys bolýyna bailanysty kóńil aitty.
