Prezident Qasym-Jomart Toqaev TMD-ǵa múshe memleketter basshylarynyń beiresmi kezdesýine qatysty, dep habarlaidy "Ult aqparat" Aqordaǵa silteme jasap.
Jiyn barysynda TMD-ǵa múshe memleketterdiń basshylary 2021 jylǵy yqpaldastyqty qorytyndylap, aldaǵy kezeńdegi ózara tiimdi yntymaqtastyqty odan ári nyǵaitý jáne damytý, sondai-aq ekonomikalyq jáne mádeni-gýmanitarlyq salalardaǵy birlesken jobalardy júzege asyrý jónindegi ortaq jospardy talqylady.
Memleketter basshylary ózara saýda-sattyqty jandandyrý sharalaryn qarastyryp, halyqaralyq jáne aimaqtyq kún tártibindegi ózekti máseleler boiynsha pikir almasty, sondai-aq pandemiianyń saldaryn eńserý jáne biologiialyq qaýipsizdikti qamtamasyz etý jónindegi birlesken is-qimyldardy talqylady.
Qazaqstan Prezidenti biologiialyq qaýipsizdikti qamtamasyz etý jónindegi ózekti máseleniń kezdesýde qarastyrylǵany úshin Resei tarapyna rizashylyǵyn bildirip, osy saladaǵy yntymaqtastyq týraly tiisti kelisimge UQShU aiasynda qol qoiylǵanyn eske saldy.
Memleket basshysy pandemiia kezinde kómek kórsetkeni úshin Resei Prezidenti Vladimir Pýtinge alǵys aitty.
– Qazaqstanǵa qiyn kezeńde qoldaý kórsetkenińiz úshin rizashylyǵymdy bildiremin. Ortaq ýaǵdalastyqty oryndaý maqsatymen Qaraǵandyda reseilik Spýtnik V tehnologiiasy negizindegi birlesken óndiristi jolǵa qoia aldyq. Spýtnik V vaktsinasy COVID-19 indetiniń taralýyna tosqaýyl qoiý isinde sheshýshi ról atqardy dep aitýǵa bolady, – dedi Prezident.
Qasym-Jomart Toqaev elimizdiń Uiymǵa kelesi jylǵy tóraǵalyǵy barysynda Qazaqstan TMD aiasyndaǵy kópjaqty yntymaqtastyqty odan ári damytýǵa daiyn ekenin aitty.
Aita keteiik, Táýelsiz Memleketter Dostastyǵyna múshe memleketter basshylarynyń dástúrli beiresmi kezdesýine Qazaqstan Prezidentimen qatar Tuńǵysh Prezident – Elbasy Nursultan Nazarbaev, Ázerbaijan Prezidenti Ilham Áliev, Armeniianyń Premer-ministri Nikol Pashinian, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Resei Prezidenti Vladimir Pýtin, Tájikstan Prezidenti Emomali Rahmon, Túrikmenstan Prezidenti Gýrbangýly Berdimuhamedov, Ózbekstan Prezidenti Shavkat Mirziioev qatysty.
