Foto: Akorda.kz
Memleket basshysy STADA Group kompaniiasynyń vitse-prezidenti Kristos Gallispen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda densaýlyq saqtaý jáne farmatsevtika salalaryndaǵy yntymaqtastyq perspektivalary talqylandy.
Qasym-Jomart Toqaev STADA kompaniiasy densaýlyqqa qajetti tutyný taýarlary segmentinde Qazaqstan naryǵyndaǵy kóshbasshylardyń úshtigine kiretinin atap ótti. Prezidenttiń aitýynsha, Almaty qalasynda kompaniia keńsesiniń ashylýy – tabysty jáne qarqyndy damyp kele jatqan yntymaqtastyqtyń aiqyn dáleli.
Memleket basshysy Qazaqstanda biotehnologiialyq klaster qurý jumysy belsendi júrgizilip jatqanyna nazar aýdardy.
Prezidenttiń pikirinshe, QazBioPharm ulttyq holdingimen ǵylymi-zertteý jáne óndiris salasynda birlese jumys isteý úshin STADA kompaniiasyna zor múmkindik ashylady.
Qasym-Jomart Toqaev germaniialyq kompaniiany birlesken zertteýler júrgizip, ázirlemeler daiyndaýǵa, óndiristi uiymdastyrýǵa, sondai-aq tájiribe almasýǵa jáne mamandardyń biliktiligin arttyrýǵa shaqyrdy.
Óz kezeginde Kristos Gallis yntymaqtastyqty nyǵaitýǵa qyzyǵýshylyq tanytyp, kompaniianyń Qazaqstandaǵy meditsinalyq jobalar men baǵdarlamalarǵa investitsiia quiý múmkindikterin qarastyrýǵa daiyn ekenin atap ótti.
STADA – joǵary sapaly dári-dármek óndiretin jetekshi kompaniialardyń biri. Kompaniia óz ónimderin álemniń 120 elinde satady.
