Prezident Qasym-Jomart Toqaevtyń tóraǵalyǵymen shuǵyl áreket etý shtabynyń kezekti otyrysy beinebailanys rejiminde ótti, - dep habarlaidy "Ult aqparat" Aqordaǵa silteme jasap.
Jiyn barysynda Bas prokýror, Ulttyq qaýipsizdik komitetiniń tóraǵasy, Ishki ister jáne Qorǵanys ministrleriniń mindetin atqarýshy tulǵalar baiandama jasady.
Memleket basshysyna quqyq qorǵaý organdary men Qarýly Kúshterdiń elimizdegi jaǵdaidy turaqtandyrý úshin qabyldaǵan belsendi sharalary týraly baiandaldy. Adamdar men kólikterdi tekserý, sondai-aq strategiialyq nysandarǵa baqylaý ornatýdy júzege asyrý maqsatymen eldi mekenderdiń aýmaǵyna 93 blokbeket qoiyldy.
Qasym-Jomart Toqaevqa zań talaptaryna baǵynbaý jáne asa mańyzdy ári strategiialyq nysandarǵa shabýyl jasaý faktileriniń qatań túrde joly kesilgeni jóninde málimet berildi. Almatyda "Barlyq" jáne "Altyn Orda" bazarlaryn tazartý barysynda 207 adam ustaldy. Olardan urlanǵan 5 avtokólik, qarý-jaraq, oq-dáriler, qalqandar tárkilendi.
Elordada aldyn alý sharalary júrgizilip jatyr. Onyń barysynda aýlalar men páterlerdiń tynyshtyǵy qamtamasyz etiledi, sondai-aq táýlik boiy avtopatrýl kúzetedi. Jalpy elimiz boiynsha tótenshe jaǵdai rejimin buzǵan 1,5 myń adam jaýapqa tartyldy.
Memleket basshysyna negizgi kúsh-jigerdiń búginde terroristerdiń mekenjaiyn anyqtap, ustaý jónindegi shuǵyl sharalarǵa baǵyttalyp otyrǵany baiandaldy.
Qasym-Jomart Toqaev elimizdegi qoǵamdyq tártip pen qaýipsizdikti qalpyna keltirý isin jalǵastyra berýdi, sondai-aq atalǵan jumystar boiynsha aqparattyq qoldaý kórsetýdi kúsheitýge tapsyrma berdi.
