QR Prezidenti Qasym-Jomart Toqaev S. Seifýllin atyndaǵy Qazaq agrotehnikalyq ýniversitetine bardy, dep habarlaidy Aqorda.
Memleket basshysy oqý ornynyń bilim berý jáne ǵylym-zertteý jumystarymen tanysty, sondai-aq, oqytýshylarmen, stýdenttermen áńgimelesti.
Ýniversitet rektory Aqylbek Kúrishbaev Prezidentke molekýliarlyq biologiia men gendik injeneriianyń zamanaýi ádisterin paidalana otyryp shyǵarylǵan aýyl sharýashylyǵy daqyldarynyń jańa sorttaryn kórsetti. 5 jyl ishinde joǵary oqý ornynyń ǵalymdary bidai men arpanyń qurǵaqshylyqqa tózimdi jańa sorttaryn shyǵardy.
Qasym-Jomart Toqaevqa bioorganikalyq tyńaitqyshtar óndirý úderisindegi jańa tehnologiianyń qoldanylýy, veterinariia júiesiniń tsifrlandyrylýy, janýarlardy esepke alý úderisi jaiynda málimet berildi.
Memleket basshysy jerdi paidalaný protsesin baqylaýǵa múmkindik beretin ǵaryshtan monitoring jasaýdyń jáne jerdi qashyqtyqtan zondtaýdyń zamanaýi ádisterimen tanysty. Atalǵan ádister Aqtóbe jáne Aqmola oblystarynda qoldanylýda. Prezident mundai tájiribeni ózge óńirlerde de paidalaný qajet dep sanaidy.
Sonymen qatar, Qasym-Jomart Toqaevqa ýniversitettiń álemdegi jetekshi ǵylym jáne bilim berý ortalyqtarymen bailanystary týraly baiandaldy. Aqylbek Kúrishbaevtyń aitýynsha, Frantsiianyń AgroParisTech ýniversitetimen birlese ázirlengen, qos diplomdyq bilim berý júiesine kóshýge múmkindik beretin jol kartasynyń iske asyrylýy Qazaq agrotehnikalyq ýniversitetiniń halyqaralyq yntymaqtastyǵyndaǵy negizgi baǵyttardyń biri.
Stýdenttermen áńgimelesý barysynda Qazaqstan Prezidenti ozyq tehnologiialardy qoldanýdyń ózektiligin atap ótti.
«Sizder óte mańyzdy jumyspen ainalysyp jatyrsyzdar. Robot tehnikasy, tsifrlandyrý jáne jasandy intellekt – qazirgi zaman talaby, ásirese, damyǵan elderde. Sondyqtan bizge artta qalyp qoiýǵa múldem bolmaidy. Jaqsy oqysańyzdar, sizder de mindetti túrde keleshekte óz oryndaryńyzdy tabasyzdar. Óitkeni bizge jeke sektorda da, memlekettik sektorda da bilikti mamandar qajet», – dedi Memleket basshysy.
Stýdentter Prezidentke qoldaý kórsetkeni jáne 2020 jyldyń qańtarynan bastap shákirtaqy kólemin 25 paiyzǵa arttyrý jónindegi tapsyrmasy úshin alǵys aitty.
