Foto: Akorda.kz
Memleket basshysy Resei gazyn Qazaqstan aýmaǵy arqyly Ózbekstanǵa tasymaldaý jobasyn iske qosý rásimine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaevtyń Resei Federatsiiasyna jumys sapary aiasynda «Orta Aziia – Ortalyq» magistraldi gaz qubyrymen Reseidiń tabiǵi gazyn Qazaqstan aýmaǵy arqyly Ózbekstanǵa tasymaldaý jobasyn iske qosý rásimi ótti.
Saltanatty sharaǵa Memleket basshysymen qatar Resei Prezidenti Vladimir Pýtin jáne Ózbekstan Prezidenti Shavkat Mirziioev qatysty.
Qasym-Jomart Toqaev óz sózinde bul tarihi oqiǵa Qazaqstan, Resei jáne Ózbekstannyń energetika salasyndaǵy strategiialyq yntymaqtastyǵyn múlde jańa deńgeige kóteretinin jáne elder arasyndaǵy tatý kórshilik qatynastar jylnamasynyń taǵy bir jarqyn betin ashatynyn atap ótti.
– Gaz salasy memleketterimizdiń turaqty áleýmettik-ekonomikalyq damýynda zor ról atqarady deýge bolady. Sondyqtan bul joba barlyq qatysýshy taraptyń múddesine sai keledi. Qazaqstan óz aýmaǵynda magistraldi gaz qubyryn daiyndaýdy ýaqtyly jáne tolyq aiaqtady. Joba Resei gazynyń eksportqa shyǵý baǵyttaryn ártaraptandyryp, Qazaqstannyń gaz tasymaldaý infraqurylymyn keńeitýge jáne jańǵyrtýǵa septigin tigizedi. Sondai-aq Ózbekstannyń jylyna 3 milliard tekshe metrge deiin jetetin jáne jyldan-jylǵa artyp kele jatqan tabiǵi gazǵa degen qajettiligin óteýge múmkindik beredi. Sonymen qatar ol elderimizdiń ónerkásibin damytýǵa, biznes-ahýaldy jaqsartýǵa, azamattardyń turmys deńgeiin arttyrýǵa tyń serpin beredi, – dedi Qazaqstan Prezidenti.
Memleket basshysynyń pikirinshe, joba Ortalyq Aziia aimaǵyndaǵy turaqtylyq pen energetikalyq qaýipsizdikti nyǵaitý isinde eleýli ról atqarady.
– Jylyna 255 milliard tekshe metrge deiin gaz tasymaldai alatyn magistraldi gaz qubyrynyń 20 myń shaqyrymnan astam bóligi elimizdiń aýmaǵy arqyly ótedi. Qazaqstan óziniń tranzittik áleýetin tolyq paidalanýǵa múddeli jáne Resei gazyn tasymaldaý kólemin odan ári ulǵaitýǵa daiyn, – dedi Prezident.
Qasym-Jomart Toqaev sóziniń sońynda mańyzdy transulttyq jobany ilgeriletýge qosqan jeke úlesi úshin Vladimir Pýtinge, sondai-aq jan-jaqty qoldaý kórsetken Shavkat Mirziioevke rizashylyǵyn bildirdi. Memleket basshysy Qazaqstan, Resei jáne Ózbekstannyń gaz salasyndaǵy mamandarynyń birlesken jumysty kásibi deńgeide ári asa zor jaýapkershilikpen atqarǵanyn atap ótti.
Sonymen qatar sharada Vladimir Pýtin men Shavkat Mirziioev sóz sóiledi.
Telekópir barysynda Energetika ministri Almasadam Sátqaliev Atyraý oblysyndaǵy «Maqat» kompressor stantsiiasynan bailanysqa shyǵyp, «Orta Aziia – Ortalyq» magistraldi gaz qubyrynyń qazaqstandyq bóligi daiyn ekenin baiandady. Ózbekstandaǵy «Qaraqalpaqiia» gaz ólsheý stantsiiasynan, Saratov oblysyndaǵy «Aleksandrov Gai» kompressor stantsiiasy men Sankt-Peterbýrgtegi Lahta-Tsentrden ózbekstandyq jáne reseilik gaz salasynyń mamandary bir mezgilde onlain bailanysqa shyǵyp, daiyndyq jumystarynyń aiaqtalǵany jóninde habarlady.
Sodan keiin úsh eldiń basshylary Resei gazyn Qazaqstan aýmaǵy arqyly Ózbekstanǵa tasymaldaý jobasyn iske qosýǵa ruqsat berdi.
