Foto: Akorda.kz
Resei gazyn elimizdiń aýmaǵy arqyly Ózbekstan Respýblikasyna tasymaldaý jobasyn iske qosý rásiminen keiin Qasym-Jomart Toqaev pen Vladimir Pýtin kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda memleketter basshylary eki eldiń strategiialyq seriktestiginiń qazirgi jai-kúii men qatynastardy odan ári nyǵaitý perspektivalaryn talqylady. Sondai-aq saýda-ekonomika, energetika, kólik-logistika jáne basqa da salalardaǵy yqpaldastyqty jalǵastyrý mańyzdy ekenin atap ótti.
Qasym-Jomart Toqaev ǵasyrlar boiy dostyq pen tatý kórshilik qatynastarǵa negizdelgen Qazaqstan men Resei arasyndaǵy bailanystar qarqyndy damyp kele jatqanyna toqtaldy.
– Memleketterimizdiń yntymaqtastyǵy kópjaqty sipatta tabysty damyp keledi. Elderimiz arasyndaǵy yqpaldastyq, eń aldymen, túrli saladaǵy strategiialyq jáne odaqtastyq qatynastarǵa negizdelgen. Búgin biz iri jobany iske qosý rásimine qatystyq. Shyn máninde, bul tsifr turǵysynan aitarlyqtai úlken bolmasa da, qysqa merzim ishinde aýqymdy jumys atqaryldy. Árine, munyń simvoldyq máni keleshekte de zor bolady, – dedi Memleket basshysy.
Óz kezeginde Vladimir Pýtin joǵary deńgeidegi ekijaqty qatynastardy odan ári nyǵaitý qajet ekenine nazar aýdardy.
– Sizdiń Máskeýge jasaǵan saparyńyz – aitýly oqiǵa. Arnaiy kelgenińiz, sondai-aq búgin tanystyrylǵan jobany birge iske asyrǵanymyz úshin Sizge rizashylyǵymdy bildiremin. Árine, bul bastamasy ǵana dep oilaimyn. Áitse de, jalpy aimaqtyń energetika salasyndaǵy yntymaqtastyǵyna baǵyttalǵan alǵashqy ári asa mańyzdy qadam. Birlese atqaratyn jumys kóp. Barlyq baǵyt boiynsha qatynastarymyz jaqsy damýda. Bul úshin Sizge alǵys aitqym keledi, – dedi Resei Prezidenti.
Áńgimelesý barysynda Qasym-Jomart Toqaev Vladimir Pýtindi týǵan kúnimen quttyqtap, Qazaqstan men Reseidiń strategiialyq seriktestigin jáne Eýraziia keńistigindegi kópjaqty integratsiialyq bailanystardy keńeitýge qosqan jeke úlesin atap ótti.
